एजेन्सी । इंग्लिस प्रिमियर लिग फुटबल अन्तर्गत शीर्षस्थानको आर्सनलले जित निकालेको छ ।
गएराति भएको खेलमा आर्सनलले वल्भ्सलाई २–१ गोलले पराजित गरेको हो । घरेलु मैदान इमिरेट्समा आर्सनलले पहिलो हाफमै २ गोल गरेको थियो । तर, दोस्रो हाफमा थप गोल गर्न सकेन ।
खेलको छैटौं मिनेटमा नै बुकायो साकाले गोल गर्दै आर्सनललाई सुरुवाती अग्रता दिलाएका थिए । १३ औं मिनेटमा कप्तान मार्टिन ओडेगार्डले गोल थप्दै आर्सनललाई २–० गोलले अघि बढाए । यता, खेलको ८६ औं मिनेटमा वल्भ्सका म्याथ्युस कुन्हाले गोल गरेपनि उनको गोल सान्त्वना गोल बन्यो ।
योसँगै शीर्षस्थानको आर्सनलको १४ खेलबाट ३३ अंक छ । वल्भ्स १५ अंकका साथ १३ औं स्थानमा छ ।
