एजेन्सी । इंग्लिस प्रिमियर लिग फुटबल अन्तर्गत लिभरपुलले रोमाञ्चक जित निकालेको छ । गएराति भएको खेलमा लिभरपुलले फुलहमलाई ४–३ गोलले पराजित गरेको हो ।
खेलको २० औं मिनेटमा घरेलु मैदान एनफिल्डमा लिभरपुलले सुरुवाती अग्रता लिएको थियो । अलेक्जान्डर आर्नल्डले फ्रिकिकबाट गरेको प्रहार पोस्टमा लागेर फुलहमका गोल किपर ब्रेन्ड लेनोलाई लाग्दै गोल हुन पुगेको थियो ।
२४ औं मिनेटमा ह्यारी विल्सनले गोल गर्दै फुलहमलाई १–१ गोलको बराबरीमा ल्याए । ३८ औं मिनेटमा म्याक एलिस्टरले गोल गर्दै लिभरपुललाई २–१ गोलले अघि बढाए । यता पहिलो हाफको इन्जुरी समयमा केन्नी टेटेले गोल गर्दै फुलहमलाई २–२ गोलको बराबरीमा ल्याए ।
८० औं मिनेटमा बबी डी कोर्डोभा रेडले गोल गर्दै फुलहमलाई ३–२ को अग्रता दिलाएका थिए । तर, लिभरपुलले दुई मिनेटमा दुई गोल गर्दै नतिजा उल्ट्यायो । ८७ औं मिनेटमा वाटरु एन्डोले गोल गर्दै लिभरपुललाई ३–३ गोलको बराबरीमा ल्याए भने ८८ औं मिनेटमा अलेक्जान्डर आर्नल्डले गोल गर्दै टोलीलाई ४–३ को जितसहित महत्वपूर्ण अंक दिलाए ।
योसँगै लिभरपुल १४ खेलमा ३१ अंक जोड्दै तालिकाको दोस्रो स्थानमा उक्लिएको छ । फुलहम १५ अंकका साथ १४ औं स्थानमा छ ।
