काठमाडौँ । इंग्लिस प्रिमियर लिग फुटबल अन्तर्गत न्युक्यासल युनाइटेड र लुटन टाउनले बराबरी खेलेका छन् ।
गएराति भएको खेलमा दुबै टोलीले ४–४ गोलको बराबरी खेल्दै अंक बाँडेका हुन् । खेलको ७ औं मिनेटमा सिन लङ्स्टाफले गोल गर्दै घरेलु टोली न्युक्यासललाई सुरुवाती अग्रता दिलाएका थिए । २१ औं मिनेटमा गाब्रियल ओसोले गोल गर्दै लुटनलाई १–१ को बराबरीमा ल्याए ।
२३ औं मिनेटमा लङ्स्टाफले व्यक्तिगत तथा टोलीका लागि पनि दोस्रो गोल गर्दै खेललाई २–१ ले अघि बढाए । ४० औं मिनेटमा रोस बार्कलीले गोल गर्दै लुटनलाई २–२ को बराबरीमा ल्याए ।
त्यसपछि ५९ औं मिनेटमा कार्टलन मोरिसले (पेनाल्टी) र ६२ औं मिनेटमा एलिजा अडेवायोले गोल गर्दै लुटनलाई ४–२ गोलले अघि बढाए । यता, ६७ औं मिनेटमा किएरन ट्रीपरले तथा ७३ औं मिनेटमा हार्भी बार्न्सले गोल गर्दै न्युक्यासललाई ४–४ को बराबरी गरे ।
बराबरीसँगै न्युक्यासल २३ खेलबाट ३३ अंकका साथ नवौं स्थानमा रहँदा लुटन २२ खेलबाट २० अंकका साथ १६ औं स्थानमा छ ।
