एजेन्सी । आईपीएल २०२४ को तेस्रो खेलमा कोलकाता नाइट राइडर्सले सनराइजर्स हैदरावादलाई पराजित गरेको छ । कोलकाता नाइट राइडर्स ४ रनले विजयी भएको हो ।
तर कोलकाता नाइट राइडर्सका मालिक शाहरुख खानको एउटा भिडियो सामाजिक सञ्जालमा निकै भाइरल भइरहेको छ । यो भाइरल भिडियोमा शाहरुख खान भिआइपी बक्समा चुरोट पिइरहेको देखिएका छन् । यसैबीच यो भाइरल भिडियोपछि विवाद लगातार बढिरहेको छ ।
हालै पाकिस्तान सुपर लिगमा पनि यस्तै दृश्य देखियो । पाकिस्तान सुपर लिगको लाइभ म्याचको क्रममा इमाद वासिम ड्रेसिङ रुममा चुरोट पिउँदै गरेको देखिएपछि ठूलो विवाद भएको थियो ।
अब कोलकाता नाइट राइडर्सका मालिक शाहरुख खानको भिडियोलाई लिएर विवाद लगातार बढिरहेको छ । शाहरुख खानको भाइरल भिडियोमा सामाजिक सञ्जाल प्रयोगकर्ताले लगातार कमेन्ट गरेर आफ्नो प्रतिक्रिया दिइरहेका छन् ।
कोलकाता नाइट राइडर्स र सनराइजर्स हैदरावादबीचको खेलको कुरा गर्दा शाहरुख खानको टोली ४ रनले विजयी भएको थियो । पहिले ब्याटिङ गरेको केकेआरले २० ओभरमा ७ विकेट गुमाएर २०८ रन बनाएको थियो । आन्द्रे रसेल २५ बलमा ६४ रन बनाएर अविजित फर्किए । फिल साल्टले ४० बलमा ५४ रनको योगदान दिए ।
जवाफमा सनराइजर्स हैदरावादको टोलीले २० ओभरमा ७ विकेट गुमाएर २०४ रन बनाउन सक्यो । सनराइजर्स हैदरावादका लागि हेनरी क्लासेनले २९ बलमा ६३ रनको बिस्फोटक पारी खेले पनि आफ्नो टोलीलाई जित दिलाउन सकेनन् ।
