काठमाडौँ । इन्डियन प्रिमियर लिग २०२४ मा राजस्थान रोयल्स (आरआर)ले लगातार दोस्रो जित निकालेको छ । राजस्थानलेले चालु सिजनको नवौं खेलमा दिल्ली क्यापिटल्स (डीसी)लाई १२ रनले पराजित गरेको हो ।
जयपुरको सवाई मानसिंह स्टेडियममा दिल्लीले टस जितेर बलिङ गर्ने निर्णय गरेको थियो । पहिले ब्याटिङ गरेको राजस्थानले २० ओभरमा ५ विकेट गुमाएर १८५ रन बनाएको थियो ।
जवाफमा दिल्लीले २० ओभरमा ५ विकेट गुमाएर १७३ रन मात्रै बनाउन सयो । खेलको प्लेयर अफ द म्याच राजस्थानका रियान पराग भए । उनले ४५ बलमा ८४ रनको पारी खेले । यो इनिङ्समा ७ चौका र ६ छक्का समावेश थियो ।
परागले ४५ बलमा १८६.६७ को स्ट्राइक रेटमा ७ चौका र ६ छक्का प्रहार गर्दै अविजित ८४ रन बनाए । रविचन्द्रन आश्विनले २९ र ध्रुव जुरेलले २० रनको योगदान दिए । दिल्लीका खलिल अहमद, मुकेश कुमार, एनरिक नोर्त्या, अक्षर पटेल र कुलदीप यादवले एक–एक विकेट लिए ।
जवाफमा दिल्लीका डेभिड वार्नरले ३४ बलमा ४९ रन बनाए । ट्रिस्टन स्टब्सले अविजित ४४, कप्तान ऋषभ पन्तले २८ र मिचेल मार्सले २३ रन बनाए । राजस्थानका युजभेन्द्र चहल र नान्द्रे बर्गरले २–२ विकेट लिए । आवेश खानले एक विकेट लिए ।
पहिले ब्याटिङ गरेको राजस्थानको सुरुवात खराब रह्यो । टोलीले ३६ रनमा शीर्ष ३ विकेट गुमाएको थियो । यशस्वी जैसवाल ५ रन, जोस बटलर ११ र सञ्जु सामसन १५ रन बनाएर आउट भए । यहाँबाट रियान परागले अर्धशतक खेल्दै स्कोर १८५ रनमा पुर्याए । रियानले रविचन्द्रन आश्विन (२९ रन)सँग ५४, ध्रुव जुरेल (२० रन)सँग ५२ र हेटमायर (१४ रन)सँग अविजित ४३ रनको साझेदारी गरे ।
१८६ रनको लक्ष्य पछ्याएको दिल्लीले अस्ट्रेलियाका ओपनर डेभिड वार्नर र मिचेल मार्ससँग २० बलमा ३० रनको ओपनिङ पार्टनरसिप बनायो । मार्स ३० रनमा आउट भएपछि रिकी भुई पनि शून्यमा आउट भए । चौथो नम्बरमा आएका ऋषभ पन्तले पनि ठूलो इनिङ खेल्न सकेनन् र २८ रन बनाएर आउट भए ।
उनले वार्नरसँग ४६ बलमा ६७ रनको साझेदारी गरे । मिडल अर्डरमा ट्रिस्टन स्टब्स र अक्षर पटेलले अविजित ५१ रनको साझेदारी गरे ।
आजको खेलः रोयल च्यालेन्जर्स बैंगलोर भर्सेस कोलकाता नाइट राइडर्स – साँझ ७ः४५ बजे
