काठमाडौं । उपप्रधान एवं गृहमन्त्री रवि लामिछानेसँग धरानउपमहानगरपालिकाका प्रमुख हर्क साम्पाङको भेट भएकाे छ । भेटमा प्रमुख साम्पाङले धरानका बिभिन्न बिषयमा गृहमन्त्री लामिछानेको ध्यानकर्षण गराउनु भएको छ ।
मेयर साम्पाङले धरान इलाका प्रहरी र ट्राफिक प्रहरी कार्यालयको भवन निर्माण, सशस्त्र प्रहरीको गुल्म स्थापना र सुरक्षाकर्मीका लागि पर्याप्त सोत–साधनको मागगर्नुभयो । उहाँले कर्मचारीले प्रक्रिया र जनप्रतिनिधिले परिणाम खोज्ने हुँदा काम गर्न कठिन हुने गरेकोगुनासो गर्नुभयो । भेटमा गृहमन्त्री लामिछानेले लोकप्रिय जनप्रतिनिधिले मन्त्रालयमै आएर राखेका माग सम्बोधनको प्रक्रिया सुरु गर्न कर्मचारीलाई निर्देशन दिनुभयो ।
गृहमन्त्री लामिछानेलाई प्रमुख साम्पाङले प्रहरीको मनोबल उच्च बनाउने गरी काम गर्न सुझाव दिनुभयाे । प्रहरीलाई ‘आम नागरिकलाई भर: गलत गर्नेलाई डर’ हुने संगठन बनाउने गृहमन्त्रीले प्रतिवद्धता जनाउनु भयो । गृहमन्त्री र प्रमुख साम्पाङबीच लागू औषध दुर्व्यसनी नियन्त्रणबारे पनि छलफल भएको गृहमन्त्रीको सचिवालयले जनाएको छ । नशाका लागि विभिन्न थरीका औषधी मिसाएर खाने प्रवृत्ति बढेको तर, त्यसविरुद्ध कारबाही चलाउन कानून नरहेकोबारे प्रमुख साम्पाङद्वारा गृहमन्त्रीलाई ध्यानाकर्षण गराउनु भयो ।
गृहमन्त्री लामिछानेले नियन्त्रणका लागि तीनै तहका सरकारबीच प्रभावकारी सहकार्य सहित विशेष अभियान सञ्चालन गर्नुपर्ने बताउनु भयो । गृहमन्त्रीले साम्पाङले हरेक शुक्रबार सञ्चालन गरिरहेको ‘सुधारबार’ अभियानमा कुनै हप्ता आफू पनि सहभागी हुने प्रतिवद्धता जनाउनु भयो ।
