काठमाडौँ । इंन्डियन प्रिमियर लिग (आईपीएल)मा राजस्थान रोयल्सले लगातार चौंथो जित निकालेको छ ।
भर्खरै सम्पन्न खेलमा राजस्थानले रोयल च्यालेन्जर्स बैंगलोरलाई ६ विकेटले पराजित गरेको हो । बैंगलोरले दिएको १८४ रनको लक्ष्य राजस्थानले १९.१ ओभरमा ४ विकेट गुमाएर भेट्टायो ।
अन्तिम बलमा छक्का प्रहार गर्दै राजस्थानका ओपनर जोस बटलरले शतक बनाउँदै अविजित रहे । ५८ बल खेलेका उनले ९ चौका र ४ छक्का प्रहार गरे ।
यस्तै, कप्तान सञ्जु सामसनले ६९ रनको योगदान दिए । ४२ बल खेलेका उनले ८ चौका र २ छक्का प्रहार गरे । सिमरोन हेटमायर ११ रनमा अविजित रहे । बलिङतर्फ बैंगलोरका रिस टोपलेले २ तथा यश दयाल र मोहम्मद सिराजले १–१ विकेट लिए ।
त्यसअघि जयपुरमा टस हारेर ब्याटिङ ब्याटिङ थालेको बैंगलोरले २० ओभरमा ३ विकेटको क्षतिमा १८३ रन जोडेको थियो । विराट कोहलीले ११३ रनको अविजित शतकीय इनिङ्स खेलेपनि टोलीको हार टार्न सकेनन् । कोहलीको यो आईपीएल इतिहासमा कीर्तिमानी आठौं शतक हो ।
७२ बल खेलेका उनले १२ चौका र ४ छक्का प्रहार गरे । यस्तै, फाफ डु प्लेसिसले ४४ रन जोड्दा अन्य ब्याट्सम्यानले दोहोरो अंकमा रन बनाउन सकेनन् ।
बलिङतर्फ राजस्थानका युजभेन्द्र चहलले २ तथा नान्द्रे बर्गरले एक विकेट लिए । जितसँगै राजस्थान अंकतालिकाको शीर्षस्थानमा उक्लिएको छ । राजस्थानको ४ खेलबाट ८ अंक छ । ५ खेलमा ४ खेलमा हार ब्यहोरेको आरसीबी २ अंकका साथ आठौं स्थानमा छ ।
