काठमार्डौं । नेकपा एमाले बाग्मती प्रदेश सभा सदस्य तथा राष्ट्रिय योजना आयोगका पूर्वउपाध्यक्ष डा. दिनेशचन्द्र देवकोटा विकास पुरस्कार २०८१ बाट सम्मानित भएका छन् ।
डिप्लोमा इन्जिनियर्स एशोसिएसन, नेपाल (डिन) को ४४ औँ स्थापना दिवस र विश्व वातावरण दिवसको अवसरमा डा. देवकोटालाई विकास पुरस्कारबाट सम्मानित गरिएको हो । उहाँलाई ११ हजार १ सय ११ रुपैयाँसहित सम्मान ग रिएको हो ।
दिगो विकास, जलवायु परिवर्तन, प्राविधिक शिक्षा, भौतिक पूर्वाधारलगायतका राष्ट्रिय तथा अन्तर्राष्ट्रिय क्षेत्रमा महत्वपूर्ण भूमिका निर्वाह गरेको भन्दै डिनले सम्मान गरेको हो ।
कार्यक्रममा खानेपानी मन्त्री राजेन्द्रकुमार राई, डिनका अध्यक्ष कामेश्वरप्रसाद सिंह, महासचिव विन्दिया कार्की लगायत अन्य पदाधिकारीहरूका बीच उहाँलाई सम्मान गरिएको हो ।
डा. देवकोटाले घरपरिवारको सम्मानमा प्राप्त पुरस्कारमा १ लाख थपेर आफ्नो हजुरबुबा र हजुरआमाका नाममा ‘बसुहरि विकास पुरस्कार’ १ लाख ११ हजार १ सय ११ राशीको अक्षय कोष स्थापना गरेका हुन् । उक्त अक्षय कोशको रकमबाट डिप्लोमा इन्जिनियर्स क्षेत्रमा प्रयोग गरिने उनले बताएका छन् ।
