काठमाडौंः संसद विघटनसम्बन्धी रिटमा परामर्श उपलब्ध गराउन सर्वोच्च अदालतले मागेको एमिकस क्युरीका लागि सर्वोच्च अदालत बार एशोसिएसनले २ जना कानुन व्यवसायीको नाम सिफारिस गरेको छ ।
शुक्रबार वरिष्ठ अधिवक्ताहरु खगेन्द्रप्रसाद अधिकारी र पूर्णमान शाक्यको नाम पठाएको सर्वोच्च अदालत बार एशोसिएसनले जनाएको छ ।
अधिकारी सर्वोच्च बारका वर्तमान अध्यक्ष हुनुहुन्छ भने शाक्य नयाँ कार्यकालका लागि हालै निर्वाचित हुनुभएको थियो ।
संसद विघटनविरुद्ध परेको रिटमा सर्वोच्चको संवैधानिक इजलासले नेपाल बार एशोसिएसनसँग ३ जना र सर्वोच्च अदालत बार एशोसिएसनसँग २ जना एमिकस क्युरी माग गरेको थियो ।
अदालतले कुनै महत्वपूर्ण विषयमा सुझाव लिनका लागि एमिकस क्युरी माग गर्ने प्रचलन छ । एमिकस क्युरीलाई अदालतको साथी पनि भन्ने गरिन्छ । एमिकस क्युरीले संविधान, कानुन र आफ्नो विवेकको आधारमा अदालतले खोजेको विषयमा राय दिनेछ ।
नेपाल बार एसोसिएसनले एमिकस क्युरीको रुपमा वरिष्ठ अधिवक्ताहरु बद्रीबहादुर कार्की, सतीशकृष्ण खरेल र विजयकान्त मैनालीलाई चयन गरेको छ ।
संसद विघटनसम्बन्धी रिटमा सर्वोच्च अदालतले पुस २२ गतेका लागि पेशी तोकेको छ र त्यसपछि निरन्तर सुनुवाइ हुनेछ ।
