म्याड्रिड । एटलेटिको म्याड्रिडले बुधबार गेटाफेलाई १-० ले हरायो र स्पेनी ला लिगाको शीर्ष स्थानमा कायम रह्यो । लुइस स्वारेजले हेडबाट गरेको एक मात्र गोलमा एट्लेटिकोले दुई खेल कम खेलेर पनि शीर्ष स्थानमा दुई अंकको अग्रता कायम राखेको हो । यो प्रशिक्षक डिएगो सिमोनीका लागि क्बलको पाँच सयौं खेल पनि रह्यो ।
लिगमा लगातार तेस्रो जितपछि एथलेटिकोको १४ खेलबाट २५ अंक भएको छ । छिमेकी रियल म्याड्र्रिड दुई अंकको दूरीमा दोस्रो स्थानमा छ । बुधबारको अर्को खेलमा रियलले एल्चेसँग १–१ को बराबरीमा रोकियो । रियलले लुका मोडरिचको गोलले २० औं मिनेटमा अग्रता लिन सफल भएको थियो ।
तर फिडेल चाभेसले पेनाल्टीबाट दोस्रो हाफमा बराबरी गोल फर्काए । पछिल्ला दुई सिजन शीर्ष चारमा स्थान बनाएको गेटाफेले पनि यसपल्ट यस्तै प्रदर्शन दोहराउन सकेको छैन । गेटाफे १७ अंकसहित १४ औं स्थानमा रहेको छ । यो रेलिगेसन क्षेत्रबाट दुई अंक अगाडि मात्र हो ।
