काठमाडौ । आप्रवासी कामदार महासन्धि पारित भए नेपाली महिला कामदारहरुले राहत पाउने सरोकारवालाहरुले बताएका छन् । आप्रवासी कामदारको अधिकार दिवसका अवसरमा महिला कानून र विकास मञ्च लगायतका संस्थाहरुले आयोजना गरेका कार्यक्रममा सरोकारवालाहरुले आप्रवासी महिला कामदारहरुको हकहित संरक्षण गर्न महासन्धिले ठूलो सहयोग गर्ने बताएका हुन् ।
महिला कानून र विकास मञ्चका कार्यकारी निर्देशक सविन श्रेष्ठले महासन्धि अनुमोदन भए सबै आप्रवासी कामदार र तिनीहरुका परिवारका सदस्यहरुको अधिकार संरक्षणमा सहयोग पुग्ने बताउनुभयो । महासन्धिले कामदार उत्पत्तिको देश र रोजगारीका लागि जाने देशको दायित्व र के गर्ने भन्ने कुरा बोलेकाले अनुमोदनको आवश्यकता रहेको उहाँले बताउनुभयो ।
आप्रवासी महिला कामदार समूहका अध्यक्ष विजया राई श्रेष्ठले नेपाली महिला कामदारमाथि समय समयमा हुने प्रतिबन्धले समस्या हुने गरेको बताउनुभयो । प्रतिबन्धका कारण महिला कामदारहरुले धेरै दुःख पाउने गरेको उल्लेख गर्दै उहाँले महासन्धि अनुमोदन भएपनि महिला कामदारहरुले राहत पाउने बताउनुभयो । महासन्धिमा कुनै पनि राष्ट्र छोड्न पाउने र उत्पत्तिको राष्ट्रमा कुनै पनि समयमा प्रवेश गर्न र रहन पाउने अधिकारको संरक्षण गरिएको छ । यस्तै कामदारको बाँच्न पाउने अधिकार, यातना, क्रुर, अमानवीय वा अपमानजनक व्यवहार वा सजाय विरुद्धको अधिकार र दासता विरुद्ध संरक्षणको अधिकार पनि संरक्षण गरिएको छ ।
कठोर श्रमसहित कारावासको सजाय पाएको अवस्थाबाहेक अन्य अवस्थामा अनिवार्य श्रम विरुद्ध संरक्षणको अधिकार, मान्यता, विवेक र धर्मको स्वतन्त्रतासम्बन्धी अधिकार तथा विचार र अभिव्यक्तिको स्वतन्त्रतासम्बन्धी अधिकार पनि समेटिएको छ ।
यस्तै गोपनीयता, पत्राचार र संचार माथिको स्वेच्छाचारी हस्तक्षेप विरुद्ध संरक्षणको अधिकार राष्ट्रको कन्सुलर वा कुटनीतिक निकायबाट संरक्षण तथा सहयोगको याचना गर्न पाउने अधिकार र रोजगारी राष्ट्रको नागरिकसरह न्यूनतम् रोजगारीको सहुलियत र सुविधा प्राप्त गर्ने अधिकार पनि महासन्धीमा समेटिएको छ ।
