महोत्तरी । महोत्तरीका छ वर्षीया गुलाव साह खातुनको हत्या प्रकरणमा संलग्न भई पक्राउ परेका आरोपीको घरमा स्थानीयहरूले आगजनी गरेका छन् । त्यस्तै बर्दिवासस्थित मुख्य चोकमा पनि स्थानीयहरूले प्रदर्शन गरेका छन् । यता प्रदर्शनलाई नियन्त्रणमा लिनका लागि अश्रु ग्याससमेत प्रहार गरेको स्थानीयले जानकारी दिएका छन्। प्रहरीले ५ राउण्ड अश्रु ग्यास प्रहार गरेको बताइएको छ।
आक्रोशित भीडले आरोपीको घरमा आगजनी गरेको प्रहरीले जनाएको छ। आगो निभाउन गएको दमकललाई स्थानीयले बीच बाटोमै रोकेका छन्।
आइतबार साँझदेखि हराइरहेकी बालिकाको शव सोमबार बेलुकी फेला परेको थियो ।
घटना विवरण:-
घरआँगन वरपर नै खेलिरहेकी खातुन आइतबार साँझ अचानक हराएपछि परिवारजन र प्रहरीले उनको खोजी गरिरहेको थियो ।
बालिकाको शव बर्दिवास–१४ कै शुभम बस्ती नजिकको झाडीमा बोरामा खाँदेको अवस्थामा फेला परेको इलाका प्रहरी कार्यालय बर्दिवासले जनाएको छ । बर्दिवास–१४ को शुभम बस्तीस्थित सामुदायिक परिवार कल्याण सङ्घको कार्यालयभन्दा पश्चिम बिकरु साहको घर पछाडिको विनोद साहको खाली जग्गामा खातुनको शव भेटिएको इलाका प्रहरी कार्यालय बर्दिवासका प्रहरी नायब उपरीक्षक राजन चापागाईँले जानकारी दिनुभयो ।
बालिकाको नियोजित हत्या गरेको आशङ्कामा प्रहरीले जिल्लाकै गौशाला नगरपालिका–५ का २५ वर्षीय अरुणकुमार साहलाई पक्राउ गरेको छ । पक्राउ गरिएका साहले प्रारम्भिक सोधपुछमै खातुनको हत्या गरेको स्वीकार गरेका प्रहरी नायब उपरीक्षक चापागाँईले बताउनुभयो । घटना प्रकृति हेर्दा बालिकालाई बलात्कार गरेर हत्या भएको स्थानीयवासीले बताएका छन् । प्रहरीले भने शव परीक्षणपछि थप कुरा खुल्दै जाने जनाएको छ । शव परीक्षणका लागि प्रादेशिक अस्पताल पठाइएको र घटनास्थललाई घेरा हालेर प्रमाण सुरक्षित राखिएको प्रहरी नायब उपरीक्षक चापागाँईको भनाइ छ ।
