काठमाडौँ । लज्जास्पद हारपछि पोखरा एभेन्जर्सका प्रशिक्षक राजीव कुमारले ट्वान्टी–२० क्रिकेटमा कहिले कहीँ खराब नतिजा आउने भएकाले हारबाट आफू धेरै चिन्तित नरहेको बताएका छन् ।
चितवन राइनोजसँग मंगलवार फराकिलो हार सामना गरेपछि प्रशिक्षक राजीवले टी–ट्वान्टी कहिले कहीँ यस्तो नतिजा आउने भएकाले आफू धेरै चिन्तित नभएको बताएका हुन् ।
साथै आफ्नो टोलीमा धेरै क्षमतावान खेलाडी रहेकाले बलियो भएर आउनेमा उनी विश्वस्त देखिन्छन् ।
१५०/१६० को लक्ष्य भेट्टाउन सहज हुने भएपनि आज खेल आफ्नो पक्षमा आउन नसकेको उनको भनाइ थियो । साथै उनले ६÷७ को अवस्थामा पुग्नु पनि सहज नतिजा नभएको र अन्तर्राष्ट्रिय क्रिकेटमा पनि कहिले कहीँ यो अवस्थाको सामना गर्नुपर्ने बताए ।
तर टी ट्वान्टी–२० मा सधैं यस्तै अवस्था नहुने र आगामी खेलमा सुधार गर्ने उनको लक्ष्य छ । आज पहिलो खेल भएकाले योजनाअनुरूप हुन नसकेको उनले उल्लेख गर्नुभयो । प्रशिक्षक राजीवले केही गल्ती भएको र चितवनले पनि राम्रो बलिङ गरेको बताए ।
यता एकै ओभरमा तीन विकेट लिएका चितवनका बलर रिजन ढकालले मेहनत गरेअनुरूप नतिजा प्राप्त भएको र यो सफलतामा बोल्ने आफूसँग शब्द नै नभएको बताए ।
पोखराको अन्तिमसम्म नारायण जोशी र विपिन खत्रीले राम्रो ब्याटिङ गरिरहेको र अन्तिम बलसम्म राम्रो बलिङ गर्ने टोलीको लक्ष्य रहेको समेत उनको भनाइ छ । सोहेल तनवीर र रवि बोपरा जस्ता अनुभवी खेलाडीबाट आफूहरूले धेरै कुरा सिक्न पाएको उनले उल्लेख गरे ।
