काठमाडौँ । च्याम्पियन्स ट्रफी २०२५ मा अष्ट्रेलियाको नेतृत्व सम्हालेका स्टिभ स्मिथले एकदिवसीय क्रिकेटबाट सन्यास लिएका छन् ।
प्रतियोगिताको सेमिफाइनलमा भारतसँग पराजित भएको भोलिपल्ट क्रिकेट अष्ट्रेलियाले यसबारे घोषणा गरेको हो ।
मंगलबार भएको खेलमा अस्ट्रेलिया भारतसँग चार विकेटले पराजित भएको थियो । प्याट कमिन्सको अनुपस्थितिमा स्मिथले टोलीको जिम्मेवारी सम्हालेका थिए ।
यद्यपि, उनले टेस्ट खेल्न भने जारी राख्नेछन् । स्मिथ टी–२० अन्तर्राष्ट्रियमा लामो समयदेखि टोलीबाट बाहिर रहेका छन् ।
स्मिथले अस्ट्रेलियाका लागि कुल १६९ एकदिवसीय खेल खेलेका छन् र ५७२७ रन बनाएका छन् । यस अवधिमा उनको औसत ४३.०६ र स्ट्राइक रेट ८७.१३ रहेको छ ।
एकदिवसीयमा उनको उत्कृष्ट इनिङ १६४ रन हो । उनले एकदिवसीय खेलमा ३४ अर्धशतक र १२ शतक प्रहार गरेका छन् ।
जारी च्याम्पियन्स ट्रफीमा स्मिथ लयमा थिएनन् । उनले तीन इनिङ्समा ४८.५० को औसतमा ९७ रनमात्रै बनाए । ७३ रन उनको उत्कृष्ट पारी थियो ।
