काठमाडौं । स्पिनर सन्दीप लामिछानेले एक दिवसीय प्रधानमन्त्री कप क्रिकेट नखेल्ने भएका छन् ।
स्वास्थ्य अवस्थाका कारण उनले केहि समय मैदान बाहिर रहने निर्णय गरेका हुन् ।
माघ ९ गते सन्दीपले हर्नियाको शल्यक्रिया गराएका थिए । चिकित्सकले अझै केही दिन मैदानमा नफर्किन सुझाव दिएपछि सन्दीपले प्रधानमन्त्री कपबाट नाम निकालेका हुन् ।
बाग्मती प्रदेशले बिहिबार पृथु बास्कोटाको कप्तानीमा १५ सदस्यीय टोलीको घोषणा गरेको थियो । नियमित कप्तान सन्दीपले आफू खेल्न असमर्थता जनाएपछि बास्कोटालाई कप्तानी दिइएको हो ।
प्रधानमन्त्री कप फागुन २५ देखि चैत १६ गतेसम्म लुम्बिनी प्रदेशमा आयोजना हुँदैछ । यस प्रतियोगितामा ७ प्रादेशिक र ३ विभागीय गरी १० टोलीको सहभागिता छ ।
