काठमाण्डौ । कागेश्वरी मनोहरा नगरपालिका वडा नं ९ मा रहेको दर्शना स्कुलले मदन पुरस्कार विजेता साहित्यकार कञ्चन पुडासैनीलाई यो वर्षको दर्शना स्रस्टा सम्मान प्रदान गर्ने निर्णय गरेको छ ।
विद्यालय व्यवस्थापन समितिका अध्यक्ष एवम् स्रस्टा सम्मान समितिका अध्यक्ष रञ्जन न्यौपानेको अध्यक्षतामा बुधबार बसेको बैठकले ‘प्रत्यागमन’ खण्डकाव्यका लागि २०४१ सालको मदन पुरस्कार विजेता कञ्चन पुडासैनीलाई सो सम्मान प्रदान गर्ने निर्णय गरेको हो ।
२५ हजार नगद राशी तथा ताम्रपत्र सहितको सो सम्मान विद्यालयले यही चैत २३ गते विद्यालयमा आयोजित एक विशेष कार्यक्रममा साहित्यकार पुडासैनीलाई प्रदान गरिने विद्यालयका प्रिन्सिपल विनोद थापा मगरले बताउनुभयो ।
स्रस्टाहरुप्रतिको सम्मानका लागि विद्यालयले स्रस्टा सम्मान गर्ने गरेको प्रिन्सिपल मगरले बताउनुभयो ।
दर्शना स्रस्टा सम्मान पहिलोपटक २०७५ सालमा राष्ट्रगानका सर्जक प्रदीपकुमार राई ‘व्याकुल माइला’ र दोस्रोपटक साहित्यकार एवम् राजनीतिज्ञ प्रदीप नेपाललाई प्रदान गरिएको थियो ।
