जनकपुरधाम । नेकपा एमालेले मधेश प्रदेश सरकारमा मुख्यमन्त्री सतीशकुमार सिंहको नेतृत्वमा रहेको गठबन्धन सरकारबाट समर्थन फिर्ता लिएको छ ।
प्रदेश सभामुख रामचन्द्र मण्डलका प्रेस सल्लाहकार अवधेश कामतका अनुसार बुधबार बसेको एमाले संसदीय दलको बैठकले सरकारलाई दिएको समर्थन फिर्ता लिने निर्णय गरेको हो ।
गत असोज ८ गते नेपाली कांग्रेसले समर्थन फिर्ता लिएसँगै सिंह नेतृत्वको सरकार अल्पमतमा परेको थियो । तर, मुख्यमन्त्री सिंहले तत्काल राजीनामा दिन अस्वीकार गर्दै २८ असोजमा विश्वासको मत लिने तयारी गरेको बताएका थिए ।
स्रोतका अनुसार मुख्यमन्त्री सिंहले एमाले नेतृत्वसँग राजीनामा दिने आश्वासन दिएका थिए, तर विश्वासको मतमार्फत सरकार टिकाउने अडान लिएपछि एमालेले समर्थन फिर्ता लिने निर्णय गरेको हो ।
यसअघि २८ भदौमा जनमत पार्टीले पनि सिंह नेतृत्वको सरकारबाट समर्थन फिर्ता लिएको थियो । एमालेको समर्थन फिर्तापछि सिंह सरकार औपचारिक रूपमा अल्पमतमा पुगेको छ ।
