काठमाडौँ । राष्ट्रपति रामचन्द्र पौडेलले समसामयिक राजनीतिक परामर्शका लागि आज साँझ शीतलनिवासमा बोलाएको सर्वदलीय छलफलमा प्रमुख दलका दोस्रो तहका नेताहरू सहभागी भएका छन् ।
छलफलमा आगामी फागुन २१ मा घोषणा भएको निर्वाचन र त्यसपछिको राजनीतिक परिदृश्यबारे केन्द्रित छलफल भइरहेको स्रोतले जनाएको छ ।
बैठकमा अन्तरिम सरकारका प्रधानमन्त्री सुशीला कार्कीसहित सबै मन्त्रीहरू उपस्थित छन् । त्यस्तै, नेपाली कांग्रेसबाट उपसभापति पूर्णबहादुर खड्का र महामन्त्री गगन थापा, नेकपा (एमाले)बाट वरिष्ठ उपाध्यक्ष ईश्वर पोखरेल र महासचिव शंकर पोखरेल, नेकपा (माओवादी केन्द्र)बाट वरिष्ठ उपाध्यक्ष नारायणकाजी श्रेष्ठ र सचिव वर्षमान पुन सहभागी छन् ।
राष्ट्रिय स्वतन्त्र पार्टीबाट कार्यवाहक सभापति डीपी अर्याल र सहमहामन्त्री विपिनकुमार आचार्य, राष्ट्रिय प्रजातन्त्र पार्टीबाट प्रवक्ता ज्ञानेन्द्र शाही र मिना लामा, नेकपा (एकीकृत समाजवादी)बाट उपाध्यक्ष राजेन्द्र पाण्डे र महासचिव धनश्याम भुसाल सहभागी रहेका छन् ।
त्यस्तै जनता समाजवादी पार्टीबाट रेनु यादव, जनमत पार्टीबाट चन्द्रकान्त राउत र डा। जयकुमार राउत, लोकतान्त्रिक समाजवादी पार्टीबाट ज्ञानेन्द्र झा र सर्वेन्द्रनाथ शुक्ला, नागरिक उन्मुक्ति पार्टीबाट रेशम चौधरी र नेपाल मजदुर किसान पार्टीबाट सुनिल प्रजापति सहभागी छन् ।
तर कांग्रेस सभापति शेरबहादुर देउवा, एमाले अध्यक्ष केपी शर्मा ओली र माओवादी केन्द्रका संयोजक पुष्पकमल दाहाल प्रचण्ड भने छलफलमा सहभागी भएका छैनन् ।
राष्ट्रपति पौडेलले प्रमुख दलहरूबीच सहमति र समन्वयका लागि सर्वदलीय छलफलको पहल गरेका हुन् ।
