काभ्रेपलाञ्चोक। न्यू गौखुरेश्वर युवा क्लब धुलिखेलको आयोजनामा गौखुरेश्वर कप काभ्रेपलाञ्चोक ‘जिल्लाव्यापी भेट्रान पुरुष भलिबल प्रतियोगिता–२०८२’ आजदेखि सुरु भएको छ । प्रतियोगितामा ४१ वर्ष माथिका खेलाडीले प्रतिस्पर्धा गर्दै छन् ।
जिल्लाका छ समूह सहभागी प्रतियोगिताको पहिलो खेल आज ज्वालाभूमी युवा क्लब र लड्केश्वर युवा क्लबबीच भएको थियो । सो प्रतिस्पर्धामा ज्वालाभूमिलाई लड्केश्वर युवा क्लबले १८–२५ र २३–२५ को सोझो सेटमा पराजित गरेको छ । दोस्रो खेलमा शारदादेवी युवा क्बले रोशी युवा क्लबलाई २५–१५ र २५–१४ को सोझो सेटमा पराजित गरेको छ ।
प्रतियोगिताको समापन पुस १५ गते हुनेछ । समूह ‘क’ मा ज्वालाभूमि युवा क्लब, लड्केश्वर युवा क्लब र समूह ‘ख’ मा रोशी युवा क्लब, शारदादेवी युवा क्लब र न्यू गौखुरेश्वर युवा क्लब रहेका छन् ।
प्रतियोगितामा प्रथम हुने टिमलाई रु २० हजार ५०५ नगद प्रदान गरिने जनाइएको छ । त्यसैगरी द्वितीय पुरस्कार रु १० हजार ५५५ र तेस्रो हुनेले रु पाँच हजार ५५५ ट्रफीसहित मेडल र प्रमाणपत्र प्राप्त गर्ने आयोजकले जनाएको छ ।
उत्कृष्ट खेलाडी, वेष्ट डिफेन्स, वेष्ट सटर, वेष्ट ब्लकर, सर्वोत्कृष्ट खेलाडीसहितलाई पुरस्कार उपलब्ध हुने आयोजकले जनाएको छ । प्रत्येक खेलमा ‘म्यान अफ द म्याच’ को व्यवस्था गरिएको छ ।
प्रतियोगिताको नगर उपप्रमुख निराजन जङ्गमले उद्घाटन गर्दै खेल र स्वास्थ्यसँग राष्ट्र र नागरिकको भविष्य जोडिएकाले स्थानीय सरकारले खेलकुदलाई प्राथमिकतामा राखेको बताउनुभयो ।रासस
