काठमाडौँ । यतिबेला सामाजिक सञ्जालमा एउटा तस्बिरले निकै चर्चा पाइरहेको छ । टेबलमा पैसाको बिटो राखेर बाँडेको तस्बिरले सामाजिक सञ्जाल तताएको हो ।
उक्त तस्बिर संखुवासभाको सिलिङचोङ गाउँपालिका–१ सिसुवाखोला गोगनेका किसानले अलैँची बिक्रीबाट प्राप्त रकम टेबलमा राखेर बाँडफाँट गरेको रहेको छ ।
गोगनेबासीले विगत सात वर्षदेखि सामूहिक रूपमा अलैँची खेती गर्दै आएका छन्। यस वर्ष मात्र उनीहरूले अलैँची खेतीबाट १ करोड १७ लाख रुपैयाँभन्दा बढी आम्दानी गरेका छन्।
ठेकेदारले अलैँची किनेर लगेपछि किसानहरूले रकम बाँड्दै गर्दा तस्बिर खिचिएको हो।
यस वर्ष गोगनेमा सामूहिक रूपमा १ सय १९ मन अलैँची उत्पादन भएको छ। हाल प्रतिमन ९० हजारदेखि १ लाख रुपैयाँसम्ममा अलैँचीको किनबेच भइरहेको छ।
गोगने सामूहिक अलैँची ४७ परिवार आबद्ध छन् । अलैँची रोप्ने, गोडमेल गर्ने र टिप्ने काम सबै सामूहिक रूपमा हुने गर्दछ।
यस वर्ष समूहले प्रतिपरिवार २ लाख ३६ हजार रुपैयाँका दरले आम्दानी बाँडेका छन्।
