काठमाडौँ । एशेज सिरिज २०२५–२६ अन्तर्गत सिड्नीमा खेलिएको पाँचौँ तथा अन्तिम टेस्टमा अष्ट्रेलियाले इंग्ल्याण्डलाई ५ विकेटले पराजित गर्दै सिरिज ४–१ ले आफ्नो नाममा गर्यो।
इंग्ल्याण्डले दोस्रो पारीमा अष्ट्रेलियासामु १६० रनको लक्ष्य प्रस्तुत गरेको थियो, जुन घरेलु टोलीले पाँचौँ दिन टी ब्रेकअघि नै पूरा गर्यो। यसैबीच, उस्मान ख्वाजाले आफ्नो करियरको अन्तिम टेस्ट खेले। ख्वाजाले सिड्नी टेस्टअघि नै अन्तर्राष्ट्रिय क्रिकेटबाट सन्यासको घोषणा गरेका थिए।
अन्तिम दिन इंग्ल्याण्डले ८ विकेटमा ३०२ रनबाट खेल सुरु गरेको थियो, तर सम्पूर्ण टोली ३४२ रनमै अलआउट भयो। यससँगै अष्ट्रेलियाले जितका लागि १६० रनको लक्ष्य पायो।
यसअघि इंग्ल्याण्डले पहिलो पारीमा ३८४ रन बनाएको थियो। जवाफमा अष्ट्रेलियाले ५६७ रनको विशाल स्कोर खडा गर्दै १८३ रनको अग्रता लिएको थियो। अष्ट्रेलियाको उक्त पारीमा स्टीभ स्मिथ र ट्राभिस हेडले शतक प्रहार गरेका थिए।
हेड प्लेयर अफ द म्याच, स्टार्क प्लेयर अफ द सिरिज
ट्राभिस हेड प्लेयर अफ द म्याच घोषित भए। उनले १६३ रनको शानदार पारी खेलेका थिए। मिचेल स्टार्क भने प्लेयर अफ द सिरिज बने। उनले सिरिजमा सर्वाधिक ३१ विकेट लिए। उनका अलावा कुनै पनि बलर २५ विकेटसम्म पुग्न सकेनन्। ब्राइडन क्रस २२ विकेटसहित दोस्रो स्थानमा रहे। स्टार्कले सिरिजमा सर्वाधिक १५३.१ ओभर बलिङ गरे, जसमा उनको औसत सबैभन्दा कम १९.९३ रह्यो।
१२१ रनमै अष्ट्रेलियाका ५ विकेट पतन
लक्ष्य पछ्याउने क्रममा अष्ट्रेलियाको सुरुवात कमजोर रह्यो। टोलीले १२१ रन बनाउँदासम्म ५ विकेट गुमाइसकेको थियो। मार्नस लाबुशेन ३७ रन बनाएर रनआउट भए। जेक वेदराल्डले ४० बलमा ३४ रन बनाए।
ख्वाजा ६ रनमै आउट
यो टेस्ट अष्ट्रेलियाली ओपनर उस्मान ख्वाजाको करियरको अन्तिम टेस्ट थियो। दोस्रो पारीमा उनी मात्र ६ रन बनाएर आउट भए र टोलीले ११९ रनमा चौथो विकेट गुमायो। ख्वाजा आउट हुनेबित्तिकै सिड्नी क्रिकेट ग्राउन्डमा उपस्थित दर्शकहरू उभिएर ताली बजाउन थाले। स्ट्यान्डमा रहेका उनका परिवारका सदस्यहरू भावुक देखिए।
