भारतको रायपुरमा शुक्रबार साँझ भएको दोस्रो टी२० क्रिकेट खेलमा भारतले न्यूजील्यान्डलाई सात विकेटले पराजित गरेको छ ।
यो जितसँगै भारतले पाँच खेलको शृंखलामा २-० ले अग्रता बनाएको छ ।
टस हारेर पहिले ब्याटिङको निम्तो पाएको न्यूजील्यान्डले निर्धारित २० ओभरमा ६ विकेट गुमाएर २०८ रनको चुनौतीपूर्ण स्कोर खडा गरेको थियो । जसमा कप्तान मिचेल सान्टनरले ४७, रचिन रबिन्द्रले ४४, टिम साइफरले २४ रनको योगदान गरेका थिए ।
तर भारतले २०९ रनको लक्ष्य २८ बल बाँकी रहँदै १५.२ ओभरमा तीन विकेट गुमाएर सहजै पार गरेको थियो । भारतका लागि कप्तान सूर्यकुमार यादवले अविजित ८२ रनको योगदान गरेका थिए जसमा ४ छक्का र ९ चौका सामेल थियो ।
अर्का ब्याट्सम्यान इशान किसनले ७६ रनको आतिशि पालि खेलेका थिए । उनले इस सोढीको बलमा आउट हुनुअघि ४ छक्का र ११ चौका प्रहार गरेका थिए । त्यस्तै, बायाँहाते ब्याटर शिभम दुबेले पनि १८ बलमा ३६ रन बनाएका थिए । उनले पनि ३ छक्का र १ चौका प्रहार गरेका थिए ।
