आइसिसि टी–२० विश्वकप क्रिकेटमा भारतले संयुक्तराज्य अमेरिकासामु जितका लागि १६२ रनको लक्ष प्रस्तुत गरेको छ ।
समूह ए मा रहेको भारतले मुम्बईको वान्खडे रंगशालामा टस हारेर पहिले ब्याटिङको निम्तो पाएको थियो । भारतले निर्धारित २० ओभरमा ९ विकेट गुमाउँदै १६१ रन बनाएको थियो ।
एक समय बोर्डमा ७७ रन हुँदा नै छ विकेट गुमाएको भारतले ११८ रन बनाउँदा सातौं तथा १४० रनमा आठौं विकेट गुमाएको थियो ।
तर भारतका लागि कप्तान सूर्य कुमार यादवले अविजित ८४ रन बनाएर टिमका लागि सम्मानजनक स्कोर खडा गरेका थिए । उनले ४ छक्का र १० चौका प्रहार गरेका थिए ।
भारतीय आक्रामक ब्याट्सम्यानहरु इशान किसनले २०, तिलक बर्माले २५ तथा अक्षर पटेलले १४ रन बनाए । तर अन्य ब्याटरहरु दोहोरो अंकमा रन समेत नबनाई पभेलियन फर्केका थिए ।
तुलनात्मक रुपमा कसिलो बलिङ र राम्रो फिल्डिङ गरेको अमेरिकाका लागि शाड्ले भान शाल्वीकले चार तथा हरमित सिंहले दुई विकेट लिएका थिए ।
