काठमाडौं । निर्वाचन आयोग, नेपालले निर्वाचन प्रचारप्रसारका क्रममा निर्वाचन चिन्हको भौतिक संरचना प्रयोग नगर्न राजनीतिक दल तथा उम्मेदवारलाई निर्देशन दिएको छ।
आयोगले जारी गरेको प्रेस विज्ञप्तिमा प्रतिनिधि सभा सदस्य निर्वाचन–२०८२ को प्रचारका क्रममा केही दल तथा उम्मेदवारले धातु, काठ वा अन्य सामग्री प्रयोग गरी निर्वाचन चिन्हको भौतिक स्वरूप बनाउने तथा सार्वजनिक स्थानमा राख्ने गरेको गुनासो प्राप्त भएको जनाएको छ। यस्ता सामग्रीले सार्वजनिक सुरक्षा र आवागमनमा जोखिम सिर्जना गर्न सक्ने आयोगको भनाइ छ।
निर्वाचन ऐन तथा निर्देशिकाअनुसार दल र उम्मेदवारलाई आयोगले तोकेको मापदण्डभित्र रहेर मात्र निर्वाचन चिन्ह प्रयोग गर्न पाइने व्यवस्था रहेको उल्लेख गर्दै आयोगले कपडा, कागज, टुल वा प्रिन्ट सामग्रीमार्फत प्रचार गर्न सकिने स्पष्ट पारेको छ।
आयोगले भौतिक संरचना बनाएर निर्वाचन चिन्ह प्रयोग गर्नु आचारसंहिताविपरीत हुने चेतावनी दिँदै त्यसो नगर्न सबै दल, उम्मेदवार तथा सरोकारवालालाई अनुरोध गरेको छ। साथै, निर्देशिका विपरीत कार्य भएमा आवश्यक कारबाही हुन सक्ने संकेत पनि आयोगले गरेको छ।
