इङलिस प्रिमियर लिगमा आइतबार राति भएको खेलमा लिगको शीर्ष स्थानमा रहेको आर्सनलले टोटेनह्याम हस्पर्सलाई ४–१ गोल अन्तरले पराजित गरेको छ ।
टोटेनह्यामको गृह मैदान टोटेनह्याम हस्पर्स स्टेडियममा भएको खेलमा आर्सनलले आकर्षक खेल प्रस्तुतिका साथ लिगमा आफ्नो स्थिति थप मजबूत बनाएको छ । यो जितसँगै आर्सनलले लिगमा २८ खेलबाट ६१ अंक जोडेको छ ।
दोस्रो स्थानमा रहेको म्यान्चेस्टर सिटीले भने २७ खेलबाट ५६ अंक सहित आर्सनललाई पछ्याइरहेको छ । यी दुई बीचको अंक दूरी केबल ५ छ ।
आर्सनलले पछिल्ला केही खेलहरुमा औसत प्रदर्शन गरेपछि सिटीसँगको अंक दूरी घटेको हो । आर्सनलले पछिल्ला पाँच खेलमा ३ मा जित र दुईमा बराबरी गरेको थियो ।
टोटेनह्यामसँगको खेलमा आर्सनलका फर्वार्ड एबिरेची एजेले ३२ र ६१ औं मिनेटमा २ गोल गरेका थिए भने भिक्टर ग्योकेरिजले ४७औं र ९४औं मिनेटमा २ गोल गरेका थिए ।
पछिल्ला खेलहरुमा कमजोर प्रदर्शन गरेपछि मुख्य प्रशिक्षक समेत बर्खास्त गरेको टोटेनह्यामका लागि एकमात्र गोल रान्डाल कोलो मुआनीले ३४औं मिनेटमा गरेका थिए ।
उता, लिभरपुलले नटिङघम फरेस्टसँग संघर्षपूर्ण खेल खेल्दै जित निकालेको छ । निकै प्रतिस्पर्धात्मक यस खेलमा लिभरपुलका लागि एकमात्र गोल ९७औं मिनेटमा म्याक एलिस्टरले गरेका थिए ।
यद्यपी, दुबै टिमबाट एकअर्काका पोस्टमा राम्रा मुभ सहित आक्रमण गरे पनि निर्धारित ९० मिनेटसम्म गोल भएको थिएन ।
यो जितसँगै लिभरपुल ४५ अंक सहित लिगमा छैटौं स्थानमा रहेको छ । गत वर्षको लिग बिजेता लिभरपुलले पछिल्ला पाँच खेलमा ३ मा जित र २ मा हार व्यहोरेको छ ।
अन्य खेलहरुका नतिजा
फुलह्याम vs सन्डरल्यान्ड (३–१)
क्रिस्टल प्यालेस vs उल्भ्स (१–०)
वेस्ट ह्याम vs बर्नमाउथ (०–०)
