काठमाडाैँ । स्याङ्जाकाे आँधिखोलाबाट अवैध रूपमा नदिजन्य पदार्थ उत्खनन गरी ओसार–पसार भइरहेको सूचनाका आधारमा प्रहरीले दुई वटा ट्र्याक्टर नियन्त्रणमा लिएको छ।
मिति २०८२ चैत १० गते जिल्ला प्रहरी कार्यालय स्याङ्जा तथा प्रहरी चौकी दहथुमबाट खटिएको संयुक्त प्रहरी टोलीले चेकजाँचका क्रममा नदिजन्य पदार्थ बोकेर ओसार–पसार गरिरहेका ट्र्याक्टरहरू फेला पारेको हो।
प्रहरीका अनुसार ग १ त ४९८८ नम्बरको ट्र्याक्टर पुतलीबजार नगरपालिका–३ बाडखोला स्थित सिद्धार्थ राजमार्गबाट जिल्ला प्रहरी कार्यालय स्याङ्जाले नियन्त्रणमा लिएको छ। यस्तै, ग १ त ७४२० नम्बरको अर्को ट्र्याक्टर भिरकोट नगरपालिका–१ दार्सिङ स्थित सिद्धार्थ राजमार्गबाट प्रहरी चौकी दहथुमले नियन्त्रणमा लिएको हो।
नियन्त्रणमा लिइएका दुवै ट्र्याक्टरलाई आवश्यक अनुसन्धान तथा कानुनी कारबाहीका लागि पुतलीबजार नगरपालिकाको कार्यालयमा पठाइएको प्रहरीले जनाएको छ।
अवैध उत्खनन तथा ढुवानी नियन्त्रणका लागि अनुगमनलाई अझ कडाइ गरिने प्रहरीको भनाइ छ।
