गोरखाका तत्कालीन राजा पृथ्वीनारायण शाहको जन्मजयन्तीको अवसरमा पुस २७ गते गोरखा नगरपालिकाले सार्वजनिक विदा दिने निर्णय गरेको छ । सोमबार सम्पन्न नगर कार्यपालिकाको बैठकले नगरपालिका माताहतका कार्यालयहरुमा सार्वजनिक विदा दिने निर्णय गरेको प्रमुख प्रशासकीय अधिकृत कृष्णकुमारी श्रेष्ठले जानकारी दिइन् ।
‘नगरपालिका माताहतका कार्यालयहरु जस्तो नगरपालिकाकै कार्यालय, वडा कार्यालयहरु, विद्यालयहरु र स्वास्थ्य संस्थाहरु आउँदो पुस २७ गते सार्वजनिक विदा दिने निर्णय भएको छ’, श्रेष्ठले भनिन्, ‘प्रदेश र संघ सरकार अन्तर्गतका कार्यालयहरुका लागि होइन, हाम्रो नगरपालिका माताहतका कार्यालयहरुमा मात्र यो निर्णय लागु हुनेछ ।’
गोरखाका तत्कालीन राजा पृथ्वीनारायण शाहले गोरखाबाट नेपाली एकीकरणको जग बसालेका हुनाले उनको सम्मानमा सार्वजनिक विदा दिने निर्णय गरेको नगरपालिकाले जनाएको छ ।
