इन्ग्लिश प्रिमियर लिग फुटबलमा म्यानचेस्टर सिटीले सहज जित निकालेको छ । आइतबार राति आर्सनललाई उसैको घरेलु मैदानमा सिटीले ३–० गोलको स्वाद चखाएको हो । सिटीको जितमा केभिन डी ब्रुएनले दुई गोल गरेका थिए । यस्तै रहिम स्ट्रर्लिङले एक गोल गरेका थिए ।
घरेलु टोलीविरुद्ध एकतर्फी जित निकाल्ने क्रममा सिटीले दोस्रो मिनेटमै ब्रुएनको गोलमा अग्रता बनाएको थियो । खेलको १५ औं मिनेटमा स्ट्रर्लिङले गोल गर्दै सिटीको अग्रता दोब्बर बनाए । त्यसपछि ब्रुएनले खेलको ४० औं मिनेटमा व्यक्तिगत दोस्रो गोल गर्दै सिटीलाई ३–० को सहज जित दिलाएका हुन् ।जितसँगै सिटीले १७ खेलबाट ३५ अंक जोडेको छ ।
तेस्रो स्थानको सिटीले शीर्ष दुई क्लबसँगको अंक दुरी समेत कम गरेको छ । लिग लिडर लिभरपुलको ४९ अंक रहदा दोस्रो स्थानको लेष्टर सिटीको ३९ अंक रहेको छ । लिगमा २२ अंक जोडेको आर्सनल नवौं स्थानमा रहेको छ ।
