काठमाडाैँ । सर्वसाधारण यात्रुहरूलाई दुर्व्यवहार गर्ने र जबरजस्ती आफूले भनेको सवारी साधनमा यात्रा गर्न दबाब दिने गरेको आरोपमा काठमाडौँ उपत्यकाका विभिन्न स्थानबाट ४८ जनालाई प्रहरीले नियन्त्रणमा लिएको छ।
जिल्ला प्रहरी परिसर काठमाडौँका अनुसार उपत्यका बाहिर जाने यात्रुहरूलाई लक्षित गर्दै केही व्यक्तिहरूले बस तथा सुमोमा चढेर आफूहरूले तोकेको सवारी साधनमा मात्र यात्रा गर्नुपर्ने भन्दै जबरजस्ती तान्ने, दुर्व्यवहार गर्ने तथा अभद्र व्यवहार गर्ने गरेको सूचनाका आधारमा प्रहरी टोली परिचालन गरिएको थियो।
प्रहरीले कालीमाटी वृत्त र मातहतका इकाइमार्फत काठमाडौं महानगरपालिका–१४ बल्खु क्षेत्रबाट १९ जनालाई नियन्त्रणमा लिएको छ। यस्तै, सोही वडाको कलंकी क्षेत्रबाट थप २४ जनालाई नियन्त्रणमा लिइएको प्रहरीले जनाएको छ।
त्यसैगरी, गोंगबुस्थित नयाँ बसपार्क क्षेत्रमा प्रहरी प्रभाग गोंगबुबाट खटिएको टोलीले ५ जनालाई नियन्त्रणमा लिएको हो।
नियन्त्रणमा लिइएका सबै व्यक्तिमाथि थप अनुसन्धान भइरहेको जिल्ला प्रहरी परिसर काठमाडौंले जनाएको छ।
प्रहरी उपरीक्षक पवन कुमार भट्टराईका अनुसार यात्रुहरूलाई अनावश्यक हैरानी दिने तथा जबरजस्ती गर्ने गतिविधि रोक्न नियमित निगरानी र कारबाहीलाई तीव्र बनाइएको छ।
