काठमाडाैँ । जिल्ला प्रहरी कार्यालय चितवनले मालपोत कार्यालय भरतपुरमा अनधिकृत रूपमा प्रवेश गर्ने ६ जनालाई पक्राउ गरेको छ। बिहीबार गरिएको कारबाहीमा उनीहरूलाई नियन्त्रणमा लिइएको प्रहरीले जनाएको छ।
यस घटनापछि मालपोत कार्यालयले सूचना जारी गर्दै कार्यालय परिसरमा अनधिकृत व्यक्तिको प्रवेशमा कडाइ गरेको छ। सेवाग्राहीलाई सेवा प्रदान गर्ने क्रममा केही व्यक्तिहरूले अनधिकृत रूपमा कार्यालयमा प्रवेश गरी सेवाग्राहीलाई झुक्याउने तथा ठगी गर्ने गुनासो बढेपछि यस्तो निर्णय गरिएको कार्यालयले स्पष्ट पारेको छ।
अबदेखि सेवा लिन आउने सम्बन्धित सेवाग्राही र कानुनबमोजिम दर्ता भएका भू–सेवा सञ्चालकहरूलाई मात्र कार्यालय प्रवेश दिइने व्यवस्था गरिएको छ। सेवासम्बन्धी कामकारबाही पनि सम्बन्धित व्यक्तिले पेश गरेको निवेदन तथा कानुनअनुसार दर्ता भएका भू–सेवा सञ्चालकहरूले पेश गरेका कागजातका आधारमा मात्र अगाडि बढाइने जनाइएको छ।
यससँगै, भू–सेवा सञ्चालकहरूले कार्यालय प्रवेश गर्दा अनिवार्य रूपमा परिचयपत्र साथमा ल्याउनुपर्ने व्यवस्था गरिएको छ। कार्यालयले सेवाग्राहीहरूलाई अनधिकृत व्यक्तिको भर नपर्न र आधिकारिक प्रक्रिया अपनाउन आग्रह गरेको छ।
