दमौली । तनहुँको व्यास नगरपालिकाले नगरक्षेत्रभित्र रहेका काठका जीर्ण पोल विस्थापन गर्ने भएको छ । काठका पोलले जोखिम बढाएपछि नगरपालिकाले त्यस्ता पोललाई हटाएर स्टिलका पोल राख्ने अभियान शुरु गरेको हो । चौध वडा रहेको नगरपालिकाभित्र काठका पोलको तथ्याङ्क सङ्कलन गरेर स्टिल पोल राख्ने अभियान शुरु गरिएको नगरपालिकाका प्रवक्ता मोहनकुमार श्रेष्ठले बताए । काठका पोल विस्थापनका लागि नगरपालिकाले १४ वडालाई पहिलो चरणमा ४५ का दरले स्टिलका पोल उपलब्ध गराएको उनले जानकारी दिए।
नगरपालिकाले उपलब्ध गराएका स्टिलका पोल वडामार्फत वितरण गर्न शुरु गरिएको वडा नं ७ का अध्यक्ष शतिश न्यौपानेले जानकारी दिए । वडाभित्र बढी जीर्ण रहेका काठेपोल विस्थापनलाई पहिलो प्राथमिकतामा राखेर नगरपालिकाबाट उपलब्ध भएका ४५ स्टिलका पोल टोल विकास संस्थामार्फत वितरण गरिसकिएका उनले बताए । “प्राथमिकताका आधारमा टोल विकास संस्थामार्फत पहिलो चरणमा उपलब्ध भएका पोल वितरण गर्यौ ”, वडाध्यक्ष न्यौपानेले भने, “बाँकी ठाउँमा पनि विस्तारै उपलब्ध गराउँदै जाने रणनीति छ ।”
एकैपटकमा सबै ठाउँमा स्टिलपोल वितरण गर्न सम्भव नभएकाले प्राथमिकताका आधारमा काठेपोल फेरिने उनले बताए । काठका पोल कुहिँदा, जीर्ण हुँदा दुर्घटना हुने सम्भावना रहने भएकाले पहिलो चरणमा त्यस्ता ठाउँका काठेपोल विस्थापन गरिने न्यौपानेले बताए ।
वडा कार्यालय भवन निर्माण: यसैबीच उक्त नगरपालिकाको वडा नं ७ को नयाँ भवन निर्माण सम्पन्न गरिएको छ । सबै वडा कार्यालयका आफ्नै भवन निर्माण गर्ने नगरपालिकाको नीतिबमोजिम केही दिनअघि सो वडाको भवन निर्माण सम्पन्न गरिएको हो । नयाँ भवनबाट छिट्टै कार्यालय सञ्चालन गर्ने तयारी थालिएको वडाध्यक्ष न्यौपानेले जानकारी दिए ।
रु ५२ लाखको लागतमा निर्माण सम्पन्न भएको भवनमा अध्यक्ष र सचिवको कार्यकक्ष, एक सभाहल तथा एक सोधपुछ कक्ष रहेको छ । भवन निर्माण सम्पन्नपछि सेवा प्रवाहमा सहज हुने न्यौपानेले बताउनुभयो । वडा कार्यालय हाल निजी व्यक्तिका घरमा दुई कोठा भाडा लिएर सञ्चालनमा छ ।
