स्पेनिस लिगको शीर्ष स्थानका उक्लिने मौका रियल मड्रिडले गुमाएको छ । शनिबार राति भएको खेलमा रियल वेटिससंग बराबरी भएपछि रियलले तालिकाको शीर्ष स्थानमा उक्लिने मौका गुमाएको हो । केही घण्टा अघि मात्र लिग लिडर बार्सिलोना ३–१ ले लेभान्टेसंग पराजित भएको थियो । सोही कारण रियललाई जित निकाल्दै शीर्ष स्थानमा उक्लिने मौका थियो । तर रियल भने गोल रहित बराबरीमा रोकिदै अंक बाँड्न बाध्य भयो ।
इडेन हजार्डले पहिलो हाफमा रियललाई अघि बढाउने कोशिश गरेका थिए । तर उनको गोल अफसाईड हुन पुगेको थियो । यस्तै रियलका भिनिसियस जुनियर र सर्जियो रामोसको प्रहारलाई वेटिसका गोलकिपरले उत्कृष्ट बचाउ गर्दै घरेलु टोलीलाई निराश बनाउने काम गरेका थिए । तर जिनेदिन जिदानको टिमले कुनै प्रहारलाई गोलमा परिणत गर्न भने सकेन । रियलका २२ प्रहारले गोलको आकार भने लिनै सकेनन् ।
शीर्ष स्थानको बार्सिलोना र रियल मड्रिडको समान २२ अंक रह्यो । तर गोल अन्तरका आधारमा बार्सिलोना शीर्ष स्थानमा रह्यो । रियल दोस्रो स्थानमा रह्यो । वेटिस क्लब १३ अंक सहित तालिकाको १४ औ स्थानमा रह्यो ।
