काठमाडौँ । सशस्त्र प्रहरी बलको हेडक्वार्टरस्थित एमटी (सवारी शाखा)मा भएको आगलागीबारे छानबिन गर्न समिति गठन गरिएको छ।
सशस्त्र प्रहरी बल प्रधान कार्यालयमा कार्यरत डीआईजी सन्दीप थापाको नेतृत्वमा समिति गठन गरिएको सशस्त्र प्रहरीका प्रवक्ता (डीआईजी) विष्णुप्रसाद भट्टले जानकारी दिएका छन्। उनका अनुसार समितिलाई घटनाको छानबिन यथाशीघ्र सम्पन्न गरी प्रतिवेदन बुझाउन निर्देशन दिइएको छ।
बुधवार राति करिब ८ बजे सशस्त्र प्रहरी प्रधान कार्यालय परिसरस्थित एमटी शाखामा आगलागी भएको थियो। बङ्गलामुखी गणबाट खटिएको टोलीले आगो नियन्त्रणमा लिएको थियो।
आगलागीका कारण केही सवारीसाधनमा क्षति पुगेको छ। यसअघि पनि सशस्त्र प्रहरी प्रधान कार्यालय र सतुंगलस्थित स्टोरमा यस्तै प्रकृतिका आगलागीका घटना भइसकेका थिए।
