इन्ग्लिश प्रिमियर लिग फुटबलमा लिग लिडर लिभरपुलले घरेलु मैदानमा संघर्षपूर्ण जित निकाल्न सफल भएको छ । आइतबार राति भएको खेलमा लिभरपुलले टोटेनहमलाई २–१ गोल अन्तरले पराजित गरेको हो । एनफिल्डमा लिभरपुलले एक गोलको अग्रता उल्टाएर जित निकालेको हो ।
ह्यारी केनले खेलको पहिलो मिनेटमै गोल गर्दै टोटेनहमलाई अग्रता दिलाएका थिए । तर, जोर्डन हेण्डरसनले खेलको ५२ औं मिनेटमा गोल गर्दै लिभरपुललाई १–१ गोलको बराबरीमा फर्काई हाले । त्यसपछि खेलको ७५ औं मिनेटमा मोहमद सलाहले पेनाल्टीमा गोल गर्दै लिभरपुललाई २१ को जित दिलाए ।
जितसँगै लिभरपुलले शीर्ष स्थानको अग्रता कायम राखेको छ । अपराजित रहेको लिभरपुलले १० खेलबाट २८ अंक जोडेको छ । लिभरपुल दोस्रो स्थानको म्यानचेस्टर सिटी भन्दा ६ अंकले अघि रहेको छ । पराजित टोटेनहम १२ अंक जोडेर लिगको ११ औं स्थानमा छ ।
