इन्ग्लिश प्रिमियर लिग फुटबलमा आर्सनल बराबरीमा रोकिएको छ । आइतबार राति भएको खेलमा क्रिष्टल प्यालेससँग आर्सनल २-२ गोलको बराबरीमा रोकिएको हो । इमिरेट्स स्टेडियममा भएको खेलमा आर्सनलका लागि खेलको सातौं मिनेटमा सोक्राटिसले गोल गरेका थिए । डेभिड लुइजको खेलको नवौं मिनेटमा गरेको गोलबाट आर्सनलले २-० को अग्रता बनायो । तर, आर्सनलले त्यसलाई स्थिर राख्न सकेन ।
खेलको ३२ औं मिनेटमा लुका मिलिभोजेभिकले गोल गर्दै क्रिष्टललाई खेलमा फर्काए । त्यसपछि जोर्डन आयुले खेलको ५२ औं मिनेटमा गोल गर्दै क्रिष्टललाई २–२ गोलको बराबरी ल्याउदै हारबाट जोगाउन सफल भए ।
यो बराबरीसँगै आर्सनलले १० खेलबाट १६ अंक जोडेको छ । आर्सनल लिगको पाँचौं स्थानमा रहेको छ । १५ अंक जोडेको क्रिष्टल छैटौं स्थानमा छ ।
