काठमाडौँ । प्रतिनिधिसभाअन्तर्गत चार वटा संसदीय समितिमा चार जना सांसदहरूको जिम्मेवारी हेरफेर गरिएको छ।
राष्ट्रिय स्वतन्त्र पार्टी (रास्वपा) का तर्फबाट प्रतिनिधित्व गर्ने सांसदहरूको समिति परिवर्तनलाई आज बसेको प्रतिनिधिसभा बैठकले सहमति प्रदान गरेको हो।
हेरफेरअनुसार सांसदहरू राम लामा, बोधनारायण श्रेष्ठ, मनिष झा र बुद्धरत्न महर्जनको समिति परिवर्तन गरिएको छ।
यसअनुसार राम लामा अन्तर्राष्ट्रिय सम्बन्ध तथा पर्यटन समितिबाट पूर्वाधार समितिमा स्थानान्तरण भएका छन् भने बोधनारायण श्रेष्ठ पूर्वाधार समितिबाट अन्तर्राष्ट्रिय सम्बन्ध तथा पर्यटन समितिमा गएका छन्।
त्यस्तै मनिष झा उपभोक्ता हित संरक्षण समितिबाट सार्वजनिक लेखा समितिमा सरुवा भएका छन्। अर्का सांसद बुद्धरत्न महर्जन सार्वजनिक लेखा समितिबाट उपभोक्ता हित संरक्षण समितिमा स्थानान्तरण भएका छन्।
