काठमाडौँ। गाजा क्षेत्रमा सोमबार भएका छुट्टाछुट्टै इजरायली हवाई आक्रमणमा एक स्वास्थ्यकर्मी र एक उच्च माध्यमिक तहकी छात्राको मृत्यु भएको छ ।
प्यालेस्टिनी आधिकारिक स्रोतहरूका अनुसार यी आक्रमणहरू गाजाका विभिन्न स्थानमा भएका हुन् । प्रत्यक्षदर्शीहरूकाअनुसार दक्षिणी गाजा पट्टीको खान युनिसस्थित अल–मावासी क्षेत्रमा गुडिरहेको एक सवारी साधनलाई लक्षित गरी इजरायली ड्रोनले मिसाइल प्रहार गरेको थियो ।
प्यालेस्टिनी चिकित्सा स्रोतले सिन्ह्वा समाचार समितिलाई दिएको जानकारी अनुसार उक्त प्रहारमा एक स्वास्थ्यकर्मी (प्यारामेडिक) को मृत्यु भएको छ भने अन्य केही व्यक्ति गम्भीर घाइते भएका छन् ।
यसैगरी, गाजा शहरको पश्चिममा पर्ने अल–रिमाल क्षेत्रमा भएको अर्को हवाई आक्रमणमा एक १७ वर्षीया छात्राको ज्यान गएको छ । प्यालेस्टिनी रेड क्रिसेन्ट सोसाइटीले जारी गरेको विज्ञप्तिअनुसार विद्यार्थीहरू परीक्षा केन्द्रतर्फ जाँदै गरेको समयमा एक व्यस्त व्यावसायिक क्षेत्रमा रहेको सवारी साधनलाई लक्षित गरी ड्रोनबाट कयौँ मिसाइल प्रहार गरिएको थियो । उक्त घटनामा घाइते भएका तीनजनालाई उद्धार गरी अल–सराय फिल्ड अस्पताल पुर्याइएको छ ।
यी पछिल्ला घटनाहरूका सम्बन्धमा इजरायली सेनाले हालसम्म कुनै प्रतिक्रिया दिएको छैन । यद्यपि, इजरायलले आफ्ना सैन्य कारबाहीहरू हमासका सदस्य र उनीहरूका सैन्य संरचना लक्षित हुने दाबी गर्दै आएको छ ।
गाजाको स्वास्थ्य मन्त्रालयद्वारा सार्वजनिक पछिल्लो तथ्याङ्क अनुसार विगत २४ घण्टामा मात्रै विभिन्न अस्पतालहरूमा ३ जनाको शव र ११ जना घाइतेहरू ल्याइएका छन् । प्रतिवेदनअनुसार सन् २०२५ अक्टोबरमा युद्धविराम लागू भएयता मृत्यु हुनेको सङ्ख्या १हजार २४ पुगेको छ भने ३,२६० जना घाइते भएका छन् ।
७ अक्टोबर २०२३ मा द्वन्द्व शुरु भएयता गाजामा ज्यान गुमाउनेको कुल सङ्ख्या ७३ हजार ३५ पुगेको छ भने १ लाख ७३ हजार ३ सय ६८ जना घाइते भएका छन् । इजरायल र हमासबीच सन् २०२५ अक्टोबरमा युद्धविराम सम्झौता भए तापनि इजरायली आक्रमणहरू भने निरन्तर जारी रहेका छन् । सिन्ह्वा/न्युज एजेन्सी नेपाल
