काठमाडाैँ । राष्ट्रिय स्वतन्त्र पार्टी (रास्वपा) को प्रथम महाधिवेशनअन्तर्गत महाधिवेशन प्रतिनिधिहरूलाई परिचयपत्र वितरण कार्य सुरु गरिएको छ।
पार्टीको निर्वाचन आयोगका प्रमुख भुवन केसीका अनुसार देशभरबाट आएका प्रतिनिधिहरूलाई परिचयपत्र वितरण भइरहेको छ। परिचयपत्र वितरण कार्य सम्पन्न भएपछि आज दिउँसो १ बजेदेखि बन्दसत्र सुरु गर्ने तयारी गरिएको उनले जानकारी दिए।
उनका अनुसार बन्दसत्रका बाँकी कार्यसूचीबारे समेत आवश्यक छलफल भइरहेको छ।
चितवनको भरतपुरमा आइतबारदेखि जारी महाधिवेशनमा देशभरबाट आएका करिब ४ हजार ५ सय प्रतिनिधिहरू सहभागी छन्। महाधिवेशनमार्फत पार्टीको भावी कार्यदिशा, संगठन विस्तार तथा अन्य महत्वपूर्ण विषयमा छलफल हुने जनाइएको छ।
