काठमाडौं । युरो कप छनोट फुटबलमा पोर्चुगलले कमजाेर मानिएकाे पूर्वी युराेपकाे लिथुनियालाई सहजै पराजित गरेको छ ।
मंगलबार राति भएको खेलमा पोर्चुगलले लिथुनियालाई ५–१ गोल अन्तरले पराजित गरेको हो ।
लिथुनियालाई पराजित गर्ने क्रममा कप्तान क्रिष्टियानो रोनाल्डोले चार गोल गरे । त्यस्तै, विलियन कार्भाल्होले एक गोल गरे । यता, लिथुनियाका लागि आन्द्रेयुस केविसियसले गोल फर्काएका थिए ।
खेलको सातौं मिनेटमा रोनाल्डोले पेनाल्टीबाट गोल गर्दै घरेलु टोली लिथुनियाविरुद्ध अग्रता बनाए । तर खेलको २८औं मिनेटमा लिथुनियाले गोल गर्दै खेल १–१ गोलको बराबरीमा पुर्याएको थियो । पहिलो हाफमा १–१ गोलको बराबरी खेलेको पोर्चुगलले दोस्रो हाफमा थप चार गोल गर्न सफल भयो ।
दोस्रो हाफमा आक्रमक खेल खेलेको पोर्चुगलका लागि खेलको ६१औं र ६५औं मिनेटमा गोल गर्दै रोनाल्डोले ह्याट्रिक पूरा गरे । त्यस्तै, खेलको ७६औं मिनेटमा अर्को गोल थप्दै रोनाल्डोले पोर्चुगलका लागि ४–१ गोलको अग्रता दिलाएका थिए । खेलको अतिरिक्त समयमा कार्भाल्होले गोल गर्दै पोर्चुगललाई ५–१ गोलको जित दिलाए ।
