काठमाडौं । स्पेनिस महारथी फुटबल क्लबद्वय बार्सिलोना र रियल म्याड्रिडले ब्राजिलियन फरवार्ड नेइमारलाई भित्र्याउन गरेको प्रस्तावलाई फ्रेञ्च क्लब पेरिस सेन्ट जर्मेन (पिएसजी) ले अस्विकार गरेको छ।
नेइमारलाई भित्र्याउन बार्सिलोनाले १०० मिलियन युरो र फिलिप काउन्टिन्हो दिने प्रस्ताव गरेको थियो। काउन्टिन्होको सट्टा इभान राकिटिकलाई पिएसजी पठाउने प्रस्ताव गरिएको बताइएको थियो।
रियल म्याड्रिडले रकमसहित गारेथ बेल र जेम्स रोद्रिगेज पिएसजी पठाउने प्रस्ताव गरेको थियो।
तर दुवै क्लबको प्रस्तावलाई पिएसजले अस्विकार गरेको छ। यद्यपी रियलको प्रस्तावमा पिएसजीले छलफल गरिरहेको बताइएको छ भने थप एक खेलाडी माग गरेको छ।
सन् २०१७ मा बार्सिलोनाबाट २२२ मिलियन युरोमा पिएसजीमा आबद्ध भएर नेइमार विश्वकै महँगा खेलाडी बनेका थिए।
नेइरमाले पिएसजीबाट २ सिजन खेल्दा ३४ लिग गोल गरेका छन्। तर उनी दुवै सिजनमा घाइते भएका थिए।
पछिल्लो समय नेइमार पिएसजीमा खुसी छैनन्। उनी क्लबको प्रिसिजन अभ्यासमा उपस्थित भएका थिएनन्। फ्रेञ्च क्लबको पहिलो खेल नेइमार खेलेका थिएनन्। सो खेलमा पिएसजीका फ्यानले नेइमारको विरोध गर्दै ‘गो अवे’ लेखिएको ब्यानर देखाएका थिए।
