नेपालगन्ज । नेपालगन्जको विपी चोकस्थित एक दर्जन फर्निचर पसलमा बिहीबार राति आगलागी हुँदा तीन करोड रुपैयाँभन्दा बढीको क्षति भएको प्रहरीले जनाएको छ।
राती ११ बजेबाट सुरु भएको आगलागी सुरक्षाकर्मी, स्थानीयवासी र ५ वटा दमकलको सहायताले बिहान ५ बजे मात्र नियन्त्रणमा आएको थियो । ६ घण्टासम्म लागेको आगोले १४ वटा पसल खरानी बनाएको छ ।
जिल्ला प्रहरी कार्यालय बाँकेका प्रवक्ता डीएसपी प्रकाश सापकोटाका अनुसार बिहीबार राति सवा ११ बजेतिर बाबा फर्निचरको विद्युत सर्ट भइ आगलागी भएको थियो। गुरुद्वाराको पूर्वपट्टि सुर्खेत रोडमा टिनको छानोमा लस्करै रहेका फर्निचर पसलहरु बाबा, ए–वान, अमन, आलिया, विन्देश्वरी र प्रतापसिंहको फर्निचरका साथै हिमालय, सानिया, स्टार, वारसी, न्यू रुबी र बाबा ट्रेडर्समा आगलागी भएको थियो। जहाँ फर्निचरको शोरुम र गोदाम थिए। आगलागीबाट सरदार डेन्टल क्लिनिकमा पनि क्षति भएको थियो।
अगालागीमा ३ करोड क्षतिको प्रारम्भिक अनुमान गरिएको उनले जानकारी दिए । ‘अहिले क्षतिको विवरण संकलन भइरहेको छ’ प्रहरी उपरीक्षक वलीले भने, ‘क्षतिको विवरण संकलन भइरहेकाले पूर्ण विवरण आउन केही समय लाग्न सक्छ ।’
वडा प्रहरी कार्यालय नेपालगन्जका इन्चार्ज प्रहरी निरीक्षक हरिबहादुर बस्नेतका अनुसार एउटा पसलबाट शुरु भएको आगो अन्यत्र पनि सल्किएको थियो । ‘टिनले बनाएको घर फर्निचरको शोरुम र गोदामको रुपमा प्रयोग गरिएका थियो’ उनले भने, ‘पसलहरु जोडिएको र फर्निचर बनाउन प्रयोग हुने प्रज्वलनशील पदार्थ समेत रहेकाले आगो निभाउन हम्मेहम्मे भयो ।’
आगलागी लगत्तै नेपालगन्ज उपमहानगरपालिकाका दुई, राँझा विमानस्थल, कोहलपुर नगरपालिका र बर्दियाको गुलरिया नगरपालिकाको एउटा गरी ५ वटा दमकलको सहायताले शुक्रबार बिहान साढे तीन बजेतिर आगो नियन्त्रणमा आएको हो। शुक्रबार बिहानैदेखि एउटा दमकल घटनास्थलमा राखिएको छ।
