काठमाडौं । आयोजक ब्राजिलले नवौं पटक कोपा अमेरिका फुटबलको उपाधि जितेको छ ।
आइतबार राति माराकाना रंगशालामा भएको खेलमा गर्दै ब्राजिलले उपाधि उचालेको हो । १२ वर्षपछि ब्राजिलले कोपा अमेरिका फुटबलको उपाधि जितेको हो ।
ब्राजिललाई उपाधि दिलाउन सौसा सोरेस, गाब्रियल जिसस र रिचार्लिसनले गोल गरे । यता, पेरुका लागि भने पाउलो गुइरेरोले गोल फर्काएका थिए ।
खेलको १५ औ मिनेटमा सोरेसले गोल गर्दै ब्राजिललाई १–० गोलको अग्रता दिलाएका थिए । तर खेलको ४४औं मिनेटमा पेरुले गोल फर्काउन सफल भयो । पेरुका लागि गुइरेरोले पेनाल्टीबाट गोल गर्दै १–१ गोलको बराबरी दिलाएका थिए । खेलको पहिलो हाफमै ब्राजिलले अग्रता बनाउन सफल भयो । पहिलो हाफको अतिरिक्त समयमा जिससले गोल गर्दै ब्राजिललाई २–१ गोलको अग्रता दिलाए ।
खेलको ७० औ मिनेटमा भने ब्राजिल १० खेलाडीमा सिमित हुन पुग्यो । जिससले दोहोरो पहेलो कार्ड खादै मैदानबाट बाहिरिएका थिए । २–१ गोलअन्तरले अघि रहेको ब्राजिलले खेलको ९० औं मिनेटमा अर्को गोल गर्न सफल भयो । यो पटक भने पेनाल्टीबाट रिचार्लिसनले गोल गर्दै ब्राजिललाई ३–१ गोलको जित दिलाए ।
आयोजक ब्राजिलले आफूले आयोजना गरेका सबै कोपाको उपाधि जितेको छ। सन् २००७ पछि ठूला प्रतियोगिताको उपाधि जित्न सकेको थिएन। सन् २०१३ को कन्फेडेरेसन कप र २०१६ को ओलम्पिक्समा स्वर्ण पदक जित्नु ब्राजिलको पछिल्ला उपलब्धि थियो।
ब्राजिलले सन् २००७ को कोपा जित्ने क्रममा अर्जेन्टिनालाई ३–० ले हराएको थियो। त्यसअघि सन् २००४ पनि ब्राजिलले अर्जेन्टिनालाई नै सिकार बनाएर ट्रफी उचालेको थियो।
पेरु ४४ वर्षपछि कोपा अमेरिकाको फाइनलमा पुगेको हो। सन् १९७५ मा उपाधि जितेपछि पेरुले फाइनलमा स्थान बनाउन सकेको थिएन।
ब्राजिलले समूह चरणको खेलमा बोलिभियालाई ३–० , पेरुलाई ५–० गोलले हराउदा भेनेजुएलासँग बराबरीमा रोकिएको थियो । यता क्वाटरफाइनलको खेलमा ब्राजिलले पाराग्वेलाई पेनाल्टी सुटआउटमा ४–३ ले पराजित गरेको थियो ।सेमिफाइनलमा ब्राजिलले चिरपरिचित प्रतिद्वन्द्वी अर्जेन्टिनलाई २–० ले हराएको थियो।
यता पेरुले समूह चरणको खेलमा भेनेजुएलालाई १–०, बोलिभियालाई ३–१ ले हराउँदा ब्राजिलसँग ५–० गोलले पराजित भएको थियो । यता क्वाटरफाइनलको खेलमा टाइब्रेकरमा उरूग्वेका स्टार स्ट्राइकर लुइस स्वारेजले पेनाल्टी चुकाएपछि पेरु ५–४ ले विजयी भएको थियो । सेमिफाइनलमा चिलीलाई ३–० ले पराजित गरेको थियो ।
