काठमाडौं । सरकारी छाप, लेटरप्याड र दस्तखत कीर्ते गरेको आरोपमा प्रहरीले २ जनालाई पक्राउ गरेको छ । पक्राउ पर्नेमा काभ्रेको धुलीखेल बस्ने बारा निजगढका ३३ वर्षीया लक्ष्मी अधिकारी र उनका श्रीमान ३८ वर्षीय राजनकुमार थापा रहेका छन् ।
महानगरीय प्रहरी वृत्त सिंहदरबारबाट खटिएको प्रहरी टोलीले उनिहरुलाई सोमबार काठमाडौं महानगरपालिका–११ सिंहदरबार दक्षिण गेट नजिकबाट पक्राउ गरेको हो ।
उनीहरुको साथबाट गृह मन्त्रालयको नक्कली लेटर प्याडमा लक्ष्मी अधिकारीको बुवाको मृत्यु नेपाल सरकारको कारणले भएको भनी प्रमाणित गरिएको कागजसमेत बरामद भएको छ । उक्त पत्रमा गृह मन्त्रालयका प्रवक्ता रामकृष्ण सुबेदीको कीर्ते हस्ताक्षर छ ।
उक्त कागजमा क्षतिपूर्ति स्वरुप १ अर्ब ८ करोड ७६ लाख दिने निर्णय गरिएको छ ।साथै प्रहरीले १३ थान बैंकको चेक, विभिन्न व्यक्तिहरुको राहदानी तथा नगद ४२ हजार २१० रुपैयाँसमेत बरामद गरेको जानकारी दिएको छ । यसबारे थप अनुसन्धान जारी छ ।
