काठमाडौं । विश्वकप क्रिकेटमा आज चर्चित दुई प्रतिद्वन्द्वी भारत र पाकिस्तानबीच प्रतिस्पर्धा हुँदैछ ।
ओल्ड ट्राफोर्ड स्टेडियममा साँझ ३ः१५ बजे सुरु हुने यस खेलको प्रतीक्षा विश्वभरका क्रिकेट सर्मथकले गरेका छन् । विश्वकपमा भारत आफ्नो चौथो खेल खेल्दै छ । पाकिस्तानले पाँचौं खेल खेल्दैछ ।
यसअघि तीन खेल सकेको भारत अपराजित यात्रा कायम राख्ने अभियानमा छ । भारतले आफ्नो पहिलो खेलमा दक्षिण अफ्रिकालाई ६ विकेटले हराएको थियो । दोस्रो खेलमा भारतले अस्ट्रेलियालाई ३६ रनले हरायो । भारत र न्युजिल्यान्डविरुद्धको खेल भने वर्षाका कारण रद्ध भएको थियो । भारतले तीन खेलबाट पाँच अंक बनाएको छ ।
यसैगरी पाकिस्तान पनि भारतलाई हराउन धेरै मिहिनेत गरिरहेको छ । तर, पाकिस्तान यसपटकको विश्वकपमा त्यति जम्न सकेको छैन । पाकिस्तान पहिलो खेलमा वेस्ट इन्डिजसँग सात विकेटले पराजित भएको थियो । दोस्रो खेलमा पाकिस्तानले घरेलु टोली इङ्ल्यान्डलाई १४ रनले हराएको थियो । पाकिस्तान र श्रीलंकाबीचको खेल भने वर्षाका कारण रद्ध भएको थियो । चौथो खेलमा पाकिस्तान अस्ट्रेलियासँग ४१ रनले पराजित भएको थियो । पाकिस्तानले चार खेलबाट तीन अंक बनाएका छ ।
भारत र पाकिस्तान दुवै विश्वकप विजेता टोली हुन् । पहिलो संस्करणदेखि नै विश्वकपमा सहभागी हुँदै आएको भारतले सन् १९८३ र सन् २०११ मा दुई पटक विश्वकपको उपाधि जितिसकेको थियो । पाकिस्तानले सन् १९९२ मा उपाधि जितेको थियो । विश्वकपको उपाधि दाबेदार भारत उत्कृष्ट लयमा छ । भारतका प्रारम्भिक ब्याट्सम्यान र बलर बलियो देखिएका छन् । पाकिस्तानको बलियो पक्ष भनेको तीव्र गतिका बलर नै हो । यसअघि यी दुई टोलीबीच भएको विश्वकप भिडन्तमा पनि भारत बलियो छ । विश्वकपमा यसअघि भारत र पाकिस्तान ६ पटक खेलेका थिए । जसमा भारतले ६ वटै खेल जितेको छ । त्यसैले आज पाकिस्तानले भारतलाई हराउन हर कोशिष गर्नेछ । भारतले पनि आफ्ना शाख कायम राख्न भरपुर प्रयास गर्नेछ ।
खेल मौसमले जित्ने अनुमान
मौसम पूर्वानुमान सम्बन्धी वेबसाइट ‘एक्युवेदर’का अनुसार म्यानचेस्टरमा आइतबार हल्का वर्षा हुने सम्भावना अत्याधिक छ । विभागका अनुसार म्यानचेस्टरमा आज दिनभरी वर्षा हुने सम्भावना ६३ प्रतिशत छ । आइतबार नै बिहान १० बजे वर्षा हुने सम्भावना ४३ प्रतिशत देखाएको थियो । यसको मतलब टसमात्रै पनि हुन सक्छ ।
भारत–पाकिस्तानमा गुगुल सर्चको शीर्ष स्थानमा मौसम
आइतबार गुगल सर्च गर्ने भारतीयको ठूलो संख्याले म्यानचेस्टरको मौसमबारेमा गुगलमा जिज्ञासा राखेका थिए । भारतसँगै पाकिस्तानमा पनि म्यानचेस्टरको आजको मौसमको पूर्वानुमान सर्च अत्यधिक मानिसले गरिरहेका छन् ।
यसअघि पनि यही विश्वकपमा तीन खेल वर्षा कारणले रद्द भइसकेको छ ।यस अघि जुन १३ मा वर्षाको कारण भारत–पाकिस्तान म्याच रद्द भएको थियो । त्यसले पनि मानिसमा वर्षाले खेल प्रभावित पार्न सक्ने डरप्रति आशंका बढाएको छ ।
