जयपुर । किङ्स–११ पञ्जाबले इन्डिन प्रिमियर लिग (आईपीएल) क्रिकेटको १२औं संस्करणमा विजयी सुरवात गरेको छ । सोमबार राति खेलिएको खेलमा पञ्जाबले राजस्थान रोयल्सलाई १४ रनले पराजित गरेको हो । टस हारी पहिले ब्याटिङको निम्तो पाएको पञ्जाबले निर्धारित २० ओभरमा चार विकेट गुमाएर १८४ रन बनायो ।
जवाफी ब्याटिङमा ओर्लिएको राजस्थानले निर्धारित ओभरमा ९ विकेट गुमाएर १७० रनमात्रै बनाउन सक्यो । पहिले ब्याटिङ गरेको पञ्जाबका लागि वेस्ट इन्डिजका आक्रामक ब्याट्सम्यान क्रिस गेलले ७९ रनको योगदान गरे । ओपनर गेलले केवल ४७ बलको सामना गरी चार छक्का र आठ चौका प्रहार गरे । उनी म्यान अफ दी म्याच घोषित भए ।
पञ्जाबक अर्का ओपनर लोकेश राहुल भने चार रनमै पेभेलियन फर्किएका थिए । युवा क्रिकेटर सर्फराज खानले अविजित ४६ रन बनाए । उनले २९ बलको सामना गरी एक छक्का र ६ चौका हिर्काए । मायान्क अग्रवालले २४ बलमा दुई छक्का र एक चौकाको मद्दतले २२ रन थपे ।
