काठमाडौँ । सेयर बजार विकास र बिस्तारका लागि भन्दै आन्दोलनको घोषण गरेको लगानीकर्ताहरुको एउटा समूहले नेपाल धितोपत्र बोर्डका एक जना कर्मचारी कार्यालयभित्रै थुनेका छन् । कार्यालयमा धर्ना दिन गएका समूहले मूख्य ढोकामा ताला लगाएर ढोकाकै अगाडि धर्नामा बसेका छन् ।
सेयर लगानीकर्ता दबाव समूहको टोली जावालाखेलस्थित बोर्डको कार्यालयमा बिहानै ताला लगाएर धर्नामा बसेको हो । धर्नाका कारण कर्मचारीहरु कार्यालयमा पस्न पाएका छैनन् । कुनै पनि कर्मचारीहरु कार्यालय प्रवेश गर्न नपाएपछि दैनिकको काम कारवाही प्रभावित बनेको छ ।
धर्नामा सहभागी लगानीकर्ताहरुका अनुसार बोर्डका अधिकारीहरुले अहिलेसम्म औपचारिक वा अनौपचारिक समस्या समाधान गर्न वार्तामा बस्न प्रस्ताव गरेका छैनन् ।
यसअघि नेपाल स्टक एक्सचेन्ज घेराउ हुँदै आमरण अनसनसम्म बसेको लगानीकर्ताहरुको उक्त समूहले आफ्नो पुरानै मागहरु अघि सार्दै गत फागुन २८ गते आन्दोलनका कार्यक्रमहरु घोषणा गरेको थियो ।
समूहले आफ्नो मुख्य मागको रुपमा अर्थमन्त्रीको बर्खास्ती रहेको बताएको छ । अर्थमन्त्री डा. युवराज खतिवडा पुँजी बजार विरोधी भएको र उनको बर्खास्ती नभएसम्म सेयर बजारमा सुधार हुन नसक्ने भएकाले बर्खास्तीको माग अघि सारेको समूहले बताउँदै आएको छ ।
