काठमाडौँ । प्रधानमन्त्री केपी ओलीले संसदमा सिके राउतसँग गरिएको सहमति र विप्लव प्रतिवन्धबारे जवाफ दिने भएका छन् । पछिलो समय यहि मुद्दाले गर्दा प्रतिपक्षि र सत्तापक्षबाटै चर्को आलोचना भएको भन्दै आज जवाफ दिन लागिएको हो ।
प्रधानमन्त्री ओलीका प्रेस सल्लाहकार कुन्दन अर्यालका अनुसार आइतबार दिउँसो १ बजे बस्ने प्रतिनिधिसभा बैठकमा ओलीले सम्बोधन गर्न लागेका हुन् । संसद बैठककमा सरकारले गरेका काम कारवाही र निर्णयबारे सांसदहरुले पछिल्लो समय संसदमा उठाएको प्रश्नको प्रधानमन्त्री ओलीले जवाफ दिने छन् ।
यसअघि गत फागुन २४ गते सरकारले स्वतन्त्र मधेस गठबन्धनका सिके राउतसँग ११ बुँदे सहमति गरेको थियो । त्यस्तै फागुन २८ गते नेत्रविक्रम चन्द ‘विप्लव’ नेतृत्वको नेकपालाई प्रतिवन्ध लगाएको थियो ।
सरकार र राउत समुहबीच ११ बुँदे सहमतिपछि राउत राजनीतिक मुलधारमा आएको सरकारी पक्षले दावी गरेपनि सहमतिपछि पनि उनका गतिविधि शंकास्पद रहेको भन्दै आलोचना रोकिएको छैन ।
