आज पूर्व र वर्तमान सञ्चारमन्त्रीबीच दोहोरी गीत चलेको छ । संसदमा नेपाली काँग्रेसका नेता तथा पूर्व सञ्चारमन्त्री डा.मिनेन्द्र रिजालले प्रधानमन्त्रीलाई ब्यंग्य गरेका थिए । उनले एउटा नेपाली गीत गाएर प्रधानमन्त्रीलाई ब्यंग्य गरे ।
संसदमा बोल्ने क्रममा उनले प्रधानमन्त्रीलाई ब्यंग्य गर्दै एउटा नेपाली गीत आउँछ भन्दै गीत गाए–नयाँ नयाँ जवानी छ नयाँ नयाँ रंग आफ्नो रुप देखेर आफै हुन्छु दंग । उनले प्रधानमन्त्री केपी ओलीले आफैलाई देखेर आफै दंग हुने गरेको बताएका थिए ।
प्रधानमन्त्री हिजोआज नेपाली जनतालाई हेरेर होइन कि आफ्ना दुई तिहाइ बहुमत देखेर मात्र आफै दंग पर्ने गरेको र अनशनमा बसेका गोविन्द केसी र उनको समर्थनमा रहेका सारा देशवासीको कुरा पनि नसुनेको आरोप लगाएका थिए ।
यता त्यस गीतको जवाफ वर्तमान सञ्चार मन्त्री गोकुल बाँस्कोटाले सालको पात टपरी हुने नहुने सल्लैको भन्ने गीतबाट जवाफ दिएका थिए । मन्त्रिपरिषदको बैठकका निर्णय जानकारी गराउन आयोजना गरिएको पत्रकार सम्मेलनमा बोल्दै मन्त्री बाँस्कोटाले संसदमा बहुमत हुनेले नै विधेयक पारित गर्ने हो पास गर्ने हो भनेका थिए ।
उनले उक्त गीतमार्फत नेपाली काँग्रेसलाई ब्यंग्य गर्दै भनेका थिए– एउटा गीत आउँछ नि हिजोआज सालको पात टपरी हुने नहुने सल्लैको भनेजस्तै बहुमतले कानुन पारित हुने नहुने अल्पमतको भनेजस्तै हो । उनले संसदमा बहुमत हुने दलले नै देशका लागि आवश्यक पर्ने कानुन बनाउने जिम्मा जनताबाट पाएको भन्दै यसमा काँग्रेसलाई टाउको दुख्नुपर्ने कारण पनि केही नभएको बताएका थिए ।
