काठमाडौं, १४ पुस ।
जाडो र बलिउड चलचित्र धुम -३ सँग डराएका नेपाली चलचित्रहरु अब बिस्तारै प्रर्दशनमा आउने भएका छन् । आउने शुक्रबार अर्थात पुस १९ गते चलचित्र ‘त्राश’ प्रदर्शन हुने भएको छ । गायक प्रकाश ओझाको निर्माण तथा निर्देशनमा बनेको ‘त्राश’ केही वर्ष अगाडी नै निर्माण भएको चलचित्र हो । चलचित्रमा नायक जीवन लुईटेलका भाई निराजन लुईटेलको साथमा अयुब केसी, अनु शाह, रिया श्रेष्ठ, प्रकाश सुब्बाको साथमा झरना थापाको बिशेष भूमिका रहेको छ । ‘त्राश’ एक्शन शैलीको चलचित्र हो ।
निर्देशक ओझाको कथा तथा संगीत रहेको यो चलचित्रमा हिमाल जोशीको सम्पादन, प्रदिप खड्काको द्धन्दनिर्देशन, पूर्नम राईको करियोग्राफी रहेको छ । पटकथा तथा संवाद मौनता श्रेष्ठले तयार पारेको यस चलचित्रलाई रोशन श्रेष्ठले खिचेका हुन् ।
