एजेन्सी । आईपीएल २०२२ अन्तर्गत गुजरात टाइटन्सले चार पटकको च्याम्पियन चेन्नई सुपर किंग्सलाई तीन विकेटले पराजित गरेको छ । पहिले ब्याटिङ गरेको चेन्नईले २० ओभरमा पाँच विकेट गुमाएर १६९ रन बनाएको थियो । जवाफमा गुजरातले १९.५ ओभरमा ७ विकेटको क्षतिमा लक्ष्य पछ्यायो ।
गुजरातका लागि ‘किलर मिलर’ले परिचित डेभिड मिलरले उत्कृष्ट ब्याटिङसहित तुफानी इनिङ्स खेल्दै खेल जिताए । मिलरले ५१ बलमा ८ चौका र ६ छक्का प्रहार गर्दै अविजित ९४ रन बनाए ।
१७ ओभरमा गुजरातको स्कोर पाँच विकेटको क्षतिमा १२२ रन थियो । त्यसपछि अन्तिम तीन ओभरमा टोलीलाई ४८ रन आवश्यक थियो । यो खेल चेन्नईले जित्छ भन्ने लाग्थ्यो तर त्यसपछि गुजरातका स्ट्यान्ड इन कप्तान राशिद खानले सानदार प्रदर्शन गरे । क्रिस जोर्डनको १८ औं ओभरमा उनले र मिलरले मिलेर २५ रन बनाए । यस ओभरमा राशिदले तीन छक्का र एक चौका प्रहार गरे ।
त्यसपछि अर्को ओभरमा ड्वेन ब्राभोले राशिद खान र अल्जारी जोसेफलाई पभिलियन पठाए । राशिद २१ बलमा ४० रन बनाएर आउट भए । गुजरातलाई अन्तिम ओभरमा १३ रन चाहिएको थियो। जोर्डन फेरि बलिङ गर्न आए । पहिलो दुई बलमा कुनै रन भएन । मिलरले तेस्रो बलमा छक्का प्रहार गरे । चौथो बलमा मिलरले क्याच गरे तर त्यो नो बल सावित भयो ।
मिलरले फ्रि हिटमा चौका प्रहार गरे । मिलरले अर्को बलमा दुई रन लिएर गुजरातलाई जित दिलाए। गुजरात ६ खेलबाट पाँच जित र एक हार ९१० अंक० सहित अंक तालिकाको शीर्ष स्थानमा छ । यस्तै, चेन्नईको टोली एक जित र पाँच हारसहित ६ खेलबाट दुई अंक जोडेर नवौं स्थानमा छ । चेन्नईको अर्को खेल अप्रिल २१ मा मुम्बई इन्डियन्ससँग हुनेछ ।
टस हारेर पहिले ब्याटिङ गरेको चेन्नईले २० ओभरमा पाँच विकेट गुमाएर १६९ रन बनाएको थियो । सीएसकेको सुरुवात खराब रह्यो र सातको स्कोरमा पहिलो झट्का लाग्यो । यसअघिको खेलका ‘हिरो’ रोबिन उथप्पा १० बलमा तीन रन बनाएर आउट भएका थिए । उनलाई शमीले एल्बडब्लू आउट गरेका थिए । खराब फर्ममा रहेका मोइन अलीले यो खेलमा पनि खासै केही गर्न सकेनन् र एक रन बनाए । उनलाई अल्जारी जोसेफले बोल्ड गरेका थिए ।
यसपछि ऋतुराज गायकवाडले अम्बाती रायडुसँग मिलेर चेन्नईको इनिङ्सलाई सम्हालेका थिए । दुवैले तेस्रो विकेटका लागि ५६ बलमा ९२ रनको साझेदारी गरे । यसैबीच, ऋतुराज फर्ममा फर्किए र सिजनको पहिलो अर्धशतक बनाए । समग्रमा यो उनको आठौं अर्धशतक हो । अर्कोतर्फ, रायुडू अर्धशतक बनाउनबाट चुके । रायुडू ३१ बलमा चार चौका र दुई छक्का प्रहार गर्दै ४६ रन बनाएर आउट भए । सोही क्रममा ऋतुराज ४८ बलमा ५ चौका र ५ छक्का प्रहार गर्दै ७३ रन बनाएर आउट भए ।
शिवम दुबेले १७ बलमा १९ रन र कप्तान रविन्द्र जडेजाले १२ बलमा अविजित २२ रन बनाए । दुबे इनिङ्सको अन्तिम बलमा आउट भए । अल्जारी जोसेफले दुई विकेट लिए भने मोहम्मद शामी र यश दयालले एक–एक विकेट लिए ।
